Мирзиёев бир сўзли инсон – Трамп

АҚШ Президенти Дональд Трамп Ўзбекистон раҳбари Шавкат Мирзиёевнинг "Boeing" компанияси билан тузган шартномасини олқишлади. Бу ҳақда Оқ уй раҳбари ўзининг Truth Social тармоғида ёзиб қолдирди. 

Трампнинг сўзларига кўра, Мирзиёев "Boeing" самолётлари бўйича улкан битим имзолаган. 

“Шу ой бошида мен Ўзбекистон Президенти ҳурматли Шавкат Мирзиёев билан суҳбатлашган эдим. Бугун мен Президент Мирзиёевни "Boeing" билан улкан битим имзолангани билан табриклайман! “Uzbekistan Airways” 8 миллиард доллардан ортиқ маблағ эвазига 22 та  "787 Dreamliner" самолётини харид қилади. Бу Қўшма Штатларда 35 000 дан ортиқ иш ўринларини яратади”, деган Трамп. 

Америка Президенти, шунингдек, Мирзиёев билан кўплаб масалаларда ишламоқчи эканини билдирган. 

“Президент Мирзиёев – бир сўзли инсон ва биз бошқа кўплаб масалалар устида биргаликда ишлашда давом этамиз! Бу масалага эътиборингиз учун ташаккур”, дея ёзган Оқ уй раҳбари. 

Қайд этиш жоиз, Шавкат Мирзиёев кеча, 22 сентябр куни Нью-Йорк шаҳрида "Boeing Global" компанияси президенти Брендан Нельсон билан учрашув ўтказди. Учрашув давомида давлат раҳбари  Boeing самолётларини етказиб бериш бўйича янги шартнома ва узоқ муддатли ҳамкорлик тўғрисидаги битим имзолади. 

Эслатиб ўтамиз, Шавкат Мирзиёев айни дамда Бирлашган Миллатлар Ташкилоти Бош Ассамблеясининг 80-юбилей сессияси тадбирларида иштирок этиш учун АҚШнинг Нью-Йорк шаҳрида бўлиб турибди. Мирзиёевнинг бугун, 23 сентябрь куни БМТ минбарида нутқ қилиши режалаштирилган.