Meta сунъий интеллект сабаб 8 минг кишини бўшатмоқчи

Meta сунъий интеллект сабабли катта миқёсда ходимларни қисқартиришни режалаштирмоқда. Бу ҳақда “Reuters” хабар берди.

Манбаларга кўра, компания 20 май куни катта ишдан бўшатиш босқичини бошлайди. Биринчи босқичда тахминан ходимларнинг 10 фоизи, яъни 8 мингга яқин одам ишидан айрилиши мумкин. Кейинги қисқартиришлар йилнинг иккинчи ярмида ҳам давом этиши эҳтимоли бор, лекин аниқ режа ҳали якуний тасдиқланмаган — бу жараён сунъий интеллект ривожига қараб ўзгариши мумкин.

Meta бу қарорларни расмий изоҳламаган, лекин нашр манбаларига кўра, компания самарадорликни ошириш учун сунъий интеллектдан кенг фойдаланишга ўтмоқда. Раҳбарият келажакда камроқ бошқарув бўғинлари ва кўпроқ AI ёрдамида ишлайдиган ходимлар тизимини яратишни мақсад қилган.

Сўнгги ойларда Meta ички тузилмасини ҳам ўзгартирган. Масалан, Reality Labs бўлимидаги муҳандислар янги “Амалиy сунъий интеллект” бўлимига ўтказилган. Бу бўлим AI агентларини — яъни код ёзадиган ва мураккаб вазифаларни бажарадиган тизимларни тезроқ ривожлантиришга қаратилган. Баъзи ходимлар эса кичик бизнеслар билан ишловчи янги бўлимга ўтказилган.

Meta илгари ҳам катта қисқартиришлар қилган: 4 йил аввал 11 мингга яқин ходим ишдан бўшатилган, 2023 йилда эса яна 10 мингга яқин иш ўрни қисқартирилган.

2025 йилда эса компания сунъий интеллект соҳасини кучайтириш учун Scale AI стартапига тахминан 15 миллиард доллар сармоя киритган. Бу Meta’нинг OpenAI, Google ва Anthropic каби рақобатчилар билан курашида кучайиш стратегиясининг бир қисми ҳисобланади.