Месси Ямалда ёшлигини кўришини айтди

Аргентиналик терма жамоаси сардори Лионель Месси янги авлод футболчилари орасида Ламин Ямални энг иқтидорли футболчи деб атади. Ҳозирда “Интер Майами” сафида тўп сураётган аргентиналик юлдузнинг айтишича, Ямаль унга ёшлигини эслатади. Бу ҳақда Месси “Lo del Pollo” нашрига берган интервьюсида сўз очди. 

“Янги авлод футболчилари жуда кучли ва уларнинг олдида ҳали узоқ йўл бор. Агар улардан бирини танлашим керак бўлса, мен Ламин Ямални танлаган бўлардим. У аллақачон эришган натижалари ва келажакдаги салоҳиятини ҳисобга олсак, ҳозирнинг энг яхшиси эканига шубҳа йўқ”, деди Месси.

18 ёшли Ямаль айни пайтда сон мушагидан олган жароҳатини тикламоқда ва шу сабаб мавсумнинг қолган қисмида майдонга туша олмайди. У жорий мавсумда 45 та ўйинда майдонга тушиб, 24 та гол уришга муваффақ бўлди. Ўтган йили испаниялик футболчи “Олтин тўп” сўровномасида иккинчи ўринни эгаллаган эди.

“Барселона” сафида Ямаль икки марта Испания чемпиони, бир марта Испания Кубоги ва икки бор Испания Суперкубоги ғолибига айланди. Испания терма жамоаси билан эса Европа чемпионлигини қўлга киритди.

38 ёшли Месси эса Испания чемпионати, “Барселона” ва Аргентина миллий терма жамоаси тарихидаги энг яхши тўпурар ҳисобланади. У Аргентина билан икки марта Америка Кубоги, Финалиссима ва 2022 йилги Жаҳон чемпионатида зафар қучган.

Месси 2005-2021 йиллар оралиғида “Барселона” сафида ўйнаб, клуб билан 10 марта Испания чемпиони ва 4 карра Чемпионлар лигаси ғолибига айланган.