Месси Пеледан ўтиб кетди

Аргентина миллий терма жамоасининг сардори Лионель Месси 2026 йилги Жаҳон чемпионатининг 1/16 финал босқичида Кабо-Вердега қарши ўйинда яна бир тарихий натижа қайд этди. Бу ҳақда “Opta” портали хабар берди.

Учрашувнинг 29-дақиқасида ҳисобни очган Месси Жаҳон чемпионатининг плей-офф босқичларида гол+пас тизими бўйича самарали ҳаракатлари сонини 12 тага етказди. Аргентиналик футболчи ҳисобида энди плей-офф ўйинларида 6 та гол ва 6 та голли узатма бор.

“Opta” маълумотларига кўра, бу 1966 йилдан буён Жаҳон чемпионатининг плей-офф босқичларида ҳар қандай футболчи қайд этган энг яхши натижа ҳисобланади. Месси ушбу кўрсаткич бўйича бразилиялик афсона Пеле ва Франция терма жамоаси ҳужумчиси Килиан Мбаппени ортда қолдирди. Улар ҳисобида 11 тадан самарали ҳаракат – 6 та гол ва 5 та голли узатма мавжуд эди.

Шунингдек, мазкур гол Месси учун 2026 йилги Жаҳон чемпионатидаги 7-гол, мундиаллар тарихидаги 20-гол ва у гол урган кетма-кет саккизинчи Жаҳон чемпионатининг учрашуви бўлди.

Эслатиб ўтамиз, эндиликда Аргентина терма жамоаси 1/8 финалда Мисрга қарши баҳс олиб боради.