Месси “Олтин тўп”ни қўлга киритиши керак – Дэвид Бекхэм

Англия терма жамоасининг собиқ ярим ҳимоячиси ва АҚШнинг “Интер Майами” клуби раиси Дэвид Бекхэм жамоанинг аргентиналик ҳужумчиси Лионель Месси 2025-2026 йилги мавсум якунлари бўйича йилнинг энг яхши футболчисига бериладиган “Олтин тўп”ни қўлга киритиши керак, деб ҳисоблайди. Бу ҳақда MLS матбуот хизмати хабар берди.

“Мен ҳали ҳам унинг клубимизда ўйнаётганига ишона олмайман. Ҳар куни машғулотларга бораман ва уни кузатаман. Унинг бугунги каби натижалар қайд этаётганини, Жаҳон чемпионатидаги ўйинини кўрганингизда, унинг “Олтин тўп”га асосий номзодлардан бири экани тасодиф эмас”, дейди Бекхэм.

Таъкидлаш жоизки, яқинда Месси “Интер Майами” билан Олий футбол лигаси ва Мексика чемпионати ғолиблари ўртасида ўтказиладиган Чемпионлар кубогида ғолиб чиқди. “Крус Асуль”га қарши учрашувда аргентиналик футболчи “Интер Майами” сафидаги 100-голини урди.

“У ўша Жаҳон чемпионатининг энг яхши футболчиларидан бири эди, ўтган мавсумда ҳам юқори даражада ўйнади. У ҳозир 39 ёшда. Менимча, у бу совринни қўлга киритиши керак. Албатта, соврин учун Ҳарри Кейн, Килиан Мбаппе, Жуд Беллингем каби бошқа буюк футболчилар ҳам бор. Аммо Месси ҳақида гап кетганда, мен уни қўллаб-қувватлайман”,  дея қўшимча қилди у.

Маълумот учун, Месси фаолияти давомида 17-марта “Олтин тўп” учун номзодлар рўйхатига киритилди. Совринни топшириш маросими жорий йилнинг 26 октябрь куни Лондонда бўлиб ўтади.