Месси қачон термадаги фаолиятини якунлайди?

Ҳужумчи Лионель Мессининг Аргентина терма жамоасида фаолиятини қачон якунлаши номаълум. Бу ҳақда футболчи “Goal TV Publica”га берган интервьюсида айтиб ўтди. 

“Тўғриси, терма жамоадаги фаолиятимни қачон якунлашимни билмайман. Вақти келганда фаолиятим тугайди. Мантиқан айтадиган бўлсам, ёшимдан келиб чиқиб, тез орада термадан кетишимга ишончим комил, лекин аниқ бир вақтни айта олмайман. Терма жамоада жуда қийин даврларни бошдан кечирдим. Биз Жаҳон ва Америка кубогида чемпион бўлдик. Терма жамоада ҳали ғалабалардан завқланмоқчиман”, дейди Месси.

Маълумот учун, Месси Аргентина терма жамоаси сафида умумий 162 та ўйинда майдонга тушиб, 86 та гол урган. “Transfermarkt”га кўра, футболчининг қиймати 35 миллион еврони ташкил этади.

Эслатиб ўтамиз, Месси июнь ойининг биринчи ҳафтасида ПСЖ билан хайрлашиб, АҚШнинг “Интер Майами” клубига кўчиб ўтганди. Футболчи “Барселона” ва “Ал-Ҳилол” каби клубларнинг шартнома имзолаш таклифларига қарамай, фаолиятини МЛСда давом эттиришга қарор қилди.