Месси фаолиятини Аргентинада давом эттириши мумкин

Аргентинанинг “Ньюэллс Олд Бойз” футбол клуби саккиз карра “Олтин тўп” соҳиби Лионель Мессини 2027 йилнинг биринчи ярмида жамоага қайтариш лойиҳаси устида ишламоқда. Бу ҳақда клуб вице-президенти Хуан Мануэль Медина TN нашрига берган интервьюсида маълум қилди.

Мединанинг таъкидлашича, лойиҳа амалга ошиши учун ҳукумат амалдорлари ҳам жараёнга жалб этилган бўлиб, улар Мессининг клубга қайтиши учун зарур шароитларни яратишга кўмаклашмоқда. Дастлабки алоқалар 2024 йилда ўрнатилган ва футболчининг атрофидагилар билан илк музокаралар ўтказилгани тасдиқланган.

“Биз Мессининг 2027 йилнинг биринчи ярмида “Ньюэллс Олд Бойз”да ўйнаши учун ишлаяпмиз, аммо ҳозирча бу фақат ғоя. Бу клуб доирасидан ташқарига чиқадиган лойиҳа – Росарио шаҳри, вилоят ва бутун Аргентина футболи учун муҳим ташаббус. Ҳаммаси инфратузилма ва рақобатбардош спорт лойиҳаси бўйича нималарни таклиф қила олишимизга боғлиқ. Биз аллақачон Месси жамоаси билан музокаралар ўтказдик, бироқ ҳозирча аниқ қарор йўқ”, дейди Медина.

Маълумот учун, Лионель Месси Испания чемпионати, “Барселона” ҳамда Аргентина терма жамоаси тарихидаги энг яхши тўпурар ҳисобланади. У миллий жамоа билан икки бор Америка Кубоги (2021, 2024), Финалиссима (2022) ва 2022 йилги Жаҳон чемпионатида ғолиб чиққан. Аргентиналик футбол юлдузи 2023 йилдан буён АҚШнинг “Интер Майами” клубида ўйнамоқда. 2025 йил декабрь ойида у жамоаси билан MLS чемпионлигини қўлга киритди.