Мерц Путинни ўт очишни тўхтатишга чақирди

Кеча, 11 май куни Германия канцлери Фридрих Мерц Россия Президенти Владимир Путинни 12 май кунидан бошлаб ўт очишни тўхтатишга чақирди. Бу ҳақда “Deutsche Welle” хабар берди.

“Агар Россия ҳозирда музокараларга тайёрлигини билдираётган бўлса, бу яхши белги. Бироқ бу етарли эмаслиги аниқ”, деган Мерц.

Германия канцлерининг таъкидлашича, агар Москва ўт очишни тўхтатишга розилиги ҳақиқий музокаралар ўтказишнинг ягона йўли саналади.

Билдирилишича, 11 майдан 12 майга ўтар кечаси ОАВ вакиллари билан суҳбатда Россия Президенти Владимир Путин Украина раҳбариятига жорий йилнинг 15 май куни Туркия пойтахти Истанбулда урушни тугатиш бўйича ҳеч қандай шартларсиз тўғридан тўғри музокаралар ўтказишни таклиф қилган.

Маълум қилинишича, Зеленский Х ижтимоий тармоғида Россия Президентини жорий йилнинг 15 май куни Туркияда кутишини ёзган.

Эслатиб ўтамиз, Германия канцлери Фридрих Мерц Киевга ташрифи чоғида Украинада 30 кунлик сўзсиз ўт очишни тўхтатиш масаласида Германия, Франция, Буюк Британия ва Полшанинг “буюк бирлиги”ни таъкидлаган эди. Мерц бу ҳақда жорий йилнинг 10 май куни Германиянинг ZDF телеканалидаги “Heute Journal” дастури эфирида маълум қилганди.

Маржона Муродова