“Мен ҳаддимдан ошиб кетдим”. Лукашенко Зеленскийдан узр сўради (видео)

Беларусь резиденти Александр Лукашенко Беларуснинг Россия ва Украина ўртасидаги урушга тортилишига қарши эканини билдириб, Киевга Минск томонидан “мутлақо ҳеч қандай хавф йўқлигини” айтди ҳамда Украина Президенти Владимир Зеленскийга нисбатан аввал айтган кескин сўзлари учун узр сўради. Бу ҳақда у “Al-Arabiya” телеканалига берган интервьюсида айтиб ўтди.

Интервьюда Россия Президенти Владимир Путин билан бу масалани муҳокама қилганини ва Москва ҳам Беларуснинг можарога тўғридан-тўғри аралашишидан манфаатдор эмаслигини таъкидлаган.

“Украина ва Россия ўртасидаги уруш Беларусь ҳудудига кўчиб ўтиши мутлақо мумкин эмас. Беларусьнинг бу урушга ҳар қандай шаклда кириши фойдадан кўра кўпроқ зарар келтиради”, деган Лукашенко Путиннинг сўзларини келтириб.

Шу билан бирга, у Беларусь ҳарбий жиҳатдан заифроқ ҳолатда эканини ва агар Украина Россиядаги каби Беларусь ҳудудига ҳам ҳужум қилса, мамлакатнинг асосий саноат ва логистика объектлари нишонага айланиши мумкинлигини айтган.

Лукашенконинг таъкидлашича, Украина ҳарбийлари Беларусь ҳудудидаги 500 га яқин эҳтимолий нишонни белгилаб қўйган.

Бироқ у яна бир бор Украинага Беларусь томонидан ҳеч қандай таҳдид йўқлигини таъкидлаган.

“Украинага Беларусь томонидан мутлақо ҳеч нарсадан қўрқишига ҳожат йўқ. Буни улар ҳам, ҳарбийлар ҳам, Украина халқи ҳам билади”, деган Лукашенко.

Зеленскийга нисбатан аввал ишлатган кескин иборалари ҳақида гапирар экан, Лукашенко айрим жойларда “ҳаддан ошган бўлиши мумкинлигини” тан олган.

“Балким мен қаердадир ҳаддан ошгандирман. Агар Владимир Александрович бундан ранжиган бўлса, ундан узр сўрайман. Балки уруш шароитини ҳисобга олиб, бундай кескин гапирмаслигим керак эди”, деган у.

Шу билан бирга, Лукашенко Зеленскийни эҳтиёткорроқ бўлишга ва Беларусга нисбатан кескин баёнотлар бермасликка чақирган.

Эслатиб ўтамиз, аввалроқ Украина томони Беларусь ҳудудида ҳарбий фаоллик кучайганини маълум қилган ва Россия Минскни урушга жалб қилишга уриниши мумкинлигини билдирган эди. Беларусь эса фақат ўзига ҳужум қилинган тақдирда урушга киришини таъкидлаб келмоқда.