“Мега битим”. Зеленский АҚШга қурол эвазига дрон сотмоқчи

Украина Президенти Владимир Зеленский ва АҚШ Президенти Дональд Трамп Украина АҚШдан қурол сотиб олиши эвазига Вашингтон Киевдан жанговар синовдан ўтган Украина дронларини сотиб олиши ҳақидаги келишувни кўриб чиқмоқда. Бу ҳақда Зеленский “New York Post” газетасига берган интервьюсида маълум қилди.

Зеленский нашрга унинг Трамп билан сўнгги музокаралари АҚШ ва Украинага авиация технологияларини мустаҳкамлашга ёрдам берадиган келишувга бағишланганини айтди. Унинг сўзларига кўра, Киев Россия билан қарама-қаршилик чоғида замонавий урушлар бўйича ўрганган барча нарсани АҚШ билан баҳам кўришга тайёр.

“Менимча, бу ҳамма учун фойдали бўлган ҳақиқий мега битим”, деди Зеленский.

“New York Post”нинг ёзишича, Украина учувчисиз учоқлари Россия ҳудудидаги нишонларга зарба бера олади. Зеленский 16 июль куни берган интервьюсида “Америка халқига бу технология керак” эканини айтган.

“Биз бу тажрибани Америка ва бошқа европалик ҳамкорлар билан баҳам кўришга тайёрмиз”, дея қўшимча қилди Зеленский.

Унинг айтишича, Украина Дания, Норвегия ва Германия билан ҳам музокаралар олиб бормоқда.