Мбаппенинг узрини эътиборга оламиз – Хитой ТИВ

Хитой Ташқи ишлар вазирлиги Килиан Мбаппенинг Мао Цзэдун ҳақидаги сўзлари учун узр сўраганига эътибор қаратди. Бироқ бу ҳолат футболчига нисбатан бойкотнинг юмшатилишига олиб келиши номаълум. Бу ҳақда Хитой ТИВ вакили Го Цзякунь брифингда журналистлар саволига жавобан тўхталди.

“Биз унинг узр сўрашини эътиборга оламиз”, дейди Го Цзякунь.

Дипломат Мбаппенинг рекламавий шартномалари бекор қилинишига муносабат билдириб, Хитой халқининг ҳис-туйғуларини оғритадиган сўз ва ҳаракатлар бутун жамият томонидан қораланишини билдирган.

Ўзи нима бўлган эди?

Мбаппе яқиндаги интервьюсида ўзи кўрган энг кулгили мем ҳақида гапириб, унда ўз юзи Хитойнинг собиқ раҳбари Мао Цзэдун суратига қўйилганини айтган. Ушбу баёнот Хитойда кескин норозиликка сабаб бўлди.

Ҳодиса ортидан футболчи Хитойда бир нечта реклама шартномаларидан айрилгани, шунингдек, Хитой марказий телевидениеси Ла Лига учрашувлари трансляцияларини тўхтатгани ҳақида хабарлар тарқалди.

Эслатиб ўтамиз, аввалроқ Ла Лига раҳбарияти хитойлик мухлислардан расман узр сўраганди. Мбаппенинг ўзи ҳам баёноти ўйламасдан айтилганини билдириб, Хитой халқига чуқур ҳурмат билан қарашини таъкидлади.