Маск СИ саноати 2026 йилдаёқ муаммога дуч келишини айтди

Илон Маск сунъий интеллект (СИ) саноати 2026 йилга бориб электр энергияси тақчиллиги муаммосига дуч келишини маълум қилди. Бу ҳақда у CNBC телеканалига берган интервьюсида сўз очди.

Унга кўра, ҳозирча тармоқнинг ўсишини яримўтказгичлар танқислиги чеклаётган бўлса-да, яқин орада асосий тўсиқ айнан энергия таъминоти бўлади.

Шунингдек, Маск xAI компанияси AMD, Nvidia ва бошқа ишлаб чиқарувчиларнинг бир миллиондан ортиқ СИ чипларини сотиб олишни режалаштираётганини билдирган. У АҚШнинг Теннесси штатида жойлашган ва 200 мингта тезлаткич билан ишлаётган Colossus суперкомпютерини “ҳозирги вақтда дунёдаги энг самарали тил модели ўқув кластери” деб атаган. Компания кейинчалик миллионлаб тезлаткичларни ўз ичига олувчи янада қудратли марказ қурмоқчи. 

Глобал контекстда Маск Хитой АҚШга қараганда энергия ишлаб чиқариш қувватларини кенгайтиришга кўпроқ инвестиция қилаётганини, бироқ АҚШ инновациялар борасида етакчиликни сақлаб қолаётганини таъкидлаган.

Шунингдек, у Tesla компаниясининг Нью-Йоркдаги ҳисоблаш маркази ҳақида ҳам маълумот берган. Билдирилишича, у ерда автопилот тизимлари ва антропоморф роботлар учун машиналарни ўқитиш ишлари олиб борилмоқда. Бундан ташқари, xAI ўзининг дата-марказлари учун Tesla’нинг стационар электр сақлаш тизимларини ҳам харид қилмоқда.

Эслатиб ўтамиз, аввалроқ OpenAI Бирлашган Араб Амирликлари пойтахти Aбу-Дабида Монаконинг умумий ҳудудидан каттароқ бўлган улкан маълумотлар маркази қуриши хабар қилинганди.