Маск Оқ уйга қайтмоқда: у келажак урушлари дастури устида ишлайди

Америкалик миллиардер ва тадбиркор Илон Маск Дональд Трамп администрациясида янги ишни ўз зиммасига олмоқда: у Пентагонга Америка қўшинларига келажак урушларини олиб бориш учун қандай қурол ва технологиялар керак бўлишини аниқлашда ёрдам беради. Бу ҳақда “Fox News” хабар берди.

Қайд этилишича, АҚШ Мудофаа вазири Пит Ҳегсет “Меридиан” лойиҳаси – Пентагоннинг бўлажак урушлар фронтлари ва зарур имкониятларни аниқлаш бўйича ташаббуси бошланганини эълон қилган. Ишга Мудофаа вазири ўринбосари Эмиль Майкл раҳбарлиги остида SpaceX асосчиси Илон Маск, Anduril асосчиси Палмер Лаки ва Вакиллар палатасининг собиқ спикери Ньют Гингрич жалб этилган.

Ҳегсетнинг сўзларига кўра, гуруҳ 120 кун давомида “урушлар, ҳудудлар ва технологиялар траекториясини хариталаштиради”, шундан сўнг хулосалар оммавий равишда тақдим этилади ва махфий илова яратилади. Ҳегсет лойиҳа кўламини “Ер қаъридан то Ойгача” қамраб олувчи деб таърифлаган.

“Биз мустақил қўмондонлик ҳақида ўн йил олдин ўйлашимиз керак эди. Биз энди “прогрессивлар” бўлими ёки “ожизлар” бўлими эмасмиз. Ҳеч қандай семизлар, стажёрлар, соқоллилар, нозиктабиатлар, радикаллар бўлмайди. Фақат жангчилар”, дейди Ҳегсет.

Ушбу ташаббус кенгроқ ислоҳотнинг бир қисмига айланган: “автоном уруш”нинг янги тўрт юлдузли қўмондонлиги (AUTOWARCOM) яратилмоқда ва қўшинларнинг барча турларида “автоном ҳарбий хизматчилар” учун карьера йўналишлари жорий этилмоқда.

Маск ва Лаки Пентагон билан ҳамкорлик қилиш тажрибасига эга: SpaceX йирик пудратчи ҳисобланади, Anduril эса автоном қурол ва илғор тизимларни ишлаб чиқади. Уларнинг иштироки манфаатлар тўқнашуви эҳтимоли ҳақидаги саволларни келтириб чиқариши мумкин.

Ҳегсет ишлар зудлик билан бошланишини, Маск, Лаки ва Гингрич билан учрашув чиқиш майдончаси яқинидаги “хавфсиз жойда” бўлиб ўтишини маълум қилган.

Маълумот учун, “Меридиан” лойиҳаси стратегия ёки сиёсатни ишлаб чиқмайди, балки бўлажак қурол-яроғ тизимларини “очиш, ишлаб чиқиш ва жорий этиш” учун устувор соҳалар ва зарур имкониятларни аниқлайди. Ташаббус Ҳегсетнинг Квантико базасида ёш етакчиларга – E-6 сержантлари ва O-3 офицерларига қаратилган қуролли кучларнинг аҳволи ҳақидаги иккинчи йиллик нутқида тақдим этилган.

Қайд этиш жоиз, Илон Маск Дональд Трамп президентлик лавозимига қайтганида унинг атрофидаги энг таъсирли шахслардан бири ҳисобланар эди. Тадбирокор бир неча ой давомида ҳукумат ишини мақбуллаштириш департаментига (DOGE) раҳбарлик қилди, бироқ кўп ўтмай у ва Трамп ўртасида низо келиб чиқди. Шундан сўнг Маск администрацияни тарк этди.

2026 йилнинг ёзида Америка ОАВлари Трамп ва Маск муносабатларни қайта тиклагани ҳақида ёзди. Хабар қилинишича, тадбиркор конгрессга сайловлар олдидан Республикачилар партиясини молиялаштиришни қайта бошлашни режалаштирмоқда.

Ўтган ҳафтада Маск Трампнинг ХХР Раиси Си Цзиньпин шарафига уюштирган давлат қабулида иштирок этди, май ойида эса Трампнинг Хитойга давлат ташрифи чоғида унга ҳамроҳлик қилган бизнес-делегация таркибида Air Force One махсус самолёти бортида Пекинга учиб борган эди.