Машҳур актёр “Норвич Сити”ни сотиб олмоқчи

Голливуд актёри Хью Жекман Англиянинг “Норвич Сити” клубидан улуш сотиб олиш бўйича музокаралар олиб бораётганини тасдиқлади. Бу ҳақда 57 ёшли актёр “talkSPORT” нашрига берган интервьюсида сўз очди.

Жекман клубга сармоя киритишга “жуда қизиқиши”ни ва бу масала бўйича ҳозир музокаралар кетаётганини айтди.

Жекман болалигидан “Норвич Сити” мухлиси ҳисобланади. Унинг онаси Норвичдан бўлиб, актёр клуб билан боғлиқлиги оиласи орқали шаклланганини айтган. Жекман бир неча марта “Карроу Роуд” стадионида бўлганини ва “Канарейкалар”ни жуда яхши кўришини таъкидлади.

Актёр, шунингдек, жамоанинг бу мавсумда Премьер-лигага кўтарилишига ишонч билдирди. Агар келишув амалга ошса, Жекман дўсти Райан Рейнольдсга ўхшаб Англия футболида клуб эгаларидан бирига айланади. Рейнольдс эса “Рексэм” клубига эгалик қилади.

Маълумот учун, “Норвич Сити” ҳозир Англия чемпионшипида иштирок этмоқда. Клубнинг асосий акциядори америкалик тадбиркор Марк Аттанасио ҳисобланади.