Макроннинг Фаластинни тан олиши ҳеч вақони англатмайди – Трамп (видео)

АҚШ Президенти Дональд Трамп Франция етакчиси Эммануэль Макроннинг Парижнинг Фаластин давлатини тан олишга тайёрлиги ҳақидаги сўзлари ҳеч қандай аҳамиятга эга эмаслигини айтди. Бу ҳақда у бугун, 25 июль куни Оқ уйнинг жанубий майсазорида журналистлар билан суҳбатда сўз очди.

“Бу баёнотнинг аҳамияти йўқ. У яхши йигит, менга ёқади. Лекин бу баёнот оғир тош босмайди”, деди Трамп журналистларга Макроннинг сўзларига изоҳ бериш сўровига жавобан.

Кеча, 24 июль куни Франция Президенти БМТ Бош Ассамблеясининг сентябрдаги сессиясида мамлакати Фаластин давлатини расман тан олишини маълум қилди. 

2024 йилда Яқин Шарқдаги вазият ёмонлашгани сабабли, Ирландия, Испания ва Норвегия ҳукуматлари Фаластин давлатини тан олишларини эълон қилишди. Бунга жавобан Исроил Дублин, Мадрид ва Ослодаги элчиларини маслаҳатлашувлар учун чақириб олганини эълон қилди. Шу билан бирга, Ирландия, Испания ва Норвегия дипломатик ваколатхоналари раҳбарлари яҳудий давлати Ташқи ишлар вазирлигига чақирилган.

Исроил Бош вазири Биньямин Нетаньяху мамлакати бу қадамни кескин қоралаши ва Фаластин давлати ташкил этилишини ўз хавфсизлигига таҳдид сифатида кўришини айтди. АҚШ Давлат котиби Марко Рубио ҳам Қўшма Штатлар Франциянинг Фаластин давлатини тан олиш ниятида қўллаб-қувватламаслигини билдирди.