Макрон ва Стармер Зеленскийни яна Трампнинг олдига олиб бормоқчи

Франция Президенти Эммануэль Макрон, Буюк Британия Бош вазири Кир Стармер ва Украина раҳбари Владимир Зеленский тез орада АҚШга расмий ташриф билан боришни режалаштирмоқда. Бу ҳақда Франция ҳукумати вакили Софи Прима брифингда маълум қилди.

“Макрон Зеленский ва Буюк Британия Бош вазири билан бирга яна Вашингтонга йўл олади”, деган у.

Шу билан бирга, Прима учта сиёсатчининг АҚШга ташрифи қачон бўлишини очиқламаган.

Қайд этилишича, томонлар айни дамда Америкага ташриф буюриш учун тайёргарлик кўрмоқда. 

Аввалроқ, Франция раҳбари тез орада ўз ижтимоий тармоқларида бугунги куннинг муҳим масалаларини жамлаган баёнот билан чиқишини эълон қилганди. Баъзи бир ОАВларга кўра, Макроннинг баёноти доирасида ушбу ташриф ҳақида маълумотлар очиқланиши мумкин.

Эслатиб ўтамиз, олдинроқ Франция Президенти Эммануэль Макрон Буюк Британия Бош вазири Кир Стармер билан биргаликда Украинада ўт очишни тўхтатиш режасини ишлаб чиққанди ва унинг тафсилотларини очиқлаганди. Франция раҳбарининг фикрича, агар Россия ва АҚШ ўртасида келишувга эришилса, Москва биринчи навбатда Украинани шарманда қилишга, хусусан, уни қуролсизлантиришга ҳаракат қилади.