Макрон иштирокидаги маросимда 2 нафар ҳарбий ҳушидан кетди (видео)

Франция Президенти Эммануэль Макрон Словакия Президенти Петер Пеллегрини билан учрашув олдидан ўтказилган расмий кутиб олиш маросимида ноқулай вазиятга дуч келди. Маросим вақтида тантанали либосдаги икки нафар ҳарбий бирин-кетин ҳушидан кетиб, ерга йиқилди. Бу ҳақда “Haberler” хабар берди.

Қайд этилишича, ҳодиса кеча, 11 ноябрь куни Париждаги Елисей саройида юз берган. Макрон словакиялик ҳамкасбини кутиб олишга тайёрланаётган пайтда сафда турган ҳарбийлардан бири тўсатдан мувозанатини йўқотиб, қўлидаги қилични тушириб юборган ва ерга йиқилган. Ҳодисани пайқаган Макрон ва сарой амалдорлари дарҳол аскарнинг ёнига югурган. Аскар ердан кўтарилиб, маросимдан олиб чиқиб кетилган.

Воқеа акс этган кадрларда ҳам Макрон ва сарой вакиллари ҳарбийга ёрдам бериш учун шошилганини кўриш мумкин.

Франция матбуоти хабарларига кўра, воқеа шу билан тугамаган. Макрон Словакия Президенти Пеллегрини билан саломлашгандан сўнг, иккинчи маросим ҳарбийси ҳам ерга йиқилган. Унинг йиқилган лаҳзаси камерага тушмаган, бироқ қиличининг ерга урилган овози эшитилган. Макрон бу ҳодисага ҳам эътибор қаратган.

Шундан кейин расмий кутиб олиш маросими давом эттирилган. Макрон эса Петер Пеллегрини билан учрашув ўтказган.

Ҳозирча ҳарбийларнинг нима сабабдан ҳушидан кетгани ва соғлиғи қандай экани ҳақида расмий маълумот берилмаган.