Макгрегор беш йиллик танаффусдан сўнг UFC’га қайтишини тасдиқлади

Икки вазн тоифасида собиқ UFC чемпиони Конор Макгрегор октагонга қайтишини расман тасдиқлади. Бу ҳақда спортчи ўзининг Instagram саҳифасида маълум қилди.

Жорий йилнинг 20 март куни Макгрегорнинг дисквалификация муддати якунига етди. У 2024 йилда учта допинг тестини (13 июнь, 19 сентябрь ва 20 сентябрь кунлари) ўтказиб юборгани сабабли 18 ойга четлатилганди. Мазкур ҳолатлар “қаердалик ҳақида маълумот бериш қоидаларини бузиш” сифатида баҳоланган.

“Миш-мишлар рост. Жаноб Конфиденcе жанг бизнесини яна қутқариш учун қайтди!”, дея ёзади Конор.

Журналист Ариэль Хелванининг маълум қилишича, Макгрегорнинг қайтиш жанги жорий йилнинг 11 июль куни Лас-Вегасда бўлиб ўтадиган UFC 330 турнири доирасида, Халқаро жанг ҳафталигида ўтказилиши режалаштирилган. Унинг таъкидлашича, бу режага фақатгина кутилмаган ҳолатлар тўсқинлик қилиши мумкин.

Аввалроқ, ирландиялик спортчи шу йилнинг 14 июнь куни Оқ уйда ўтказилиши режалаштирилган турнирда иштирок этиш вариантини ҳам кўриб чиққан, бироқ якуний рўйхатга киритилмаган.

Маълумот учун, Макгрегор охирги бор 2021 йил июль ойида UFC 264 турнирида Дастин Порьега қарши жанг қилиб, оёғидан олган жароҳати сабаб техник нокаут билан мағлуб бўлган эди. Шундан бери у октагонда жанг ўтказмаган. Ҳозирда Макгрегорнинг профессионал ММА рекорди 22 ғалаба ва 6 мағлубиятдан иборат.