Лукашенко Алиевга Қорабоғни тиклашда ёрдам таклиф қилди

Беларусь резиденти Александр Лукашенко бугун, 16 май куни Озарбайжон Президенти Илҳом Алиев билан учрашувда Бакуга қайтарилган ҳудудларни урушдан кейин қайта тиклашда ёрдам беришни таклиф қилди. Бу ҳақда “БелТА” агентлиги хабар берди.

Лукашенко ҳарбий ҳаракатлар тугагандан сўнг ҳудудларни тиклаш ва ривожлантириш энг муҳим ва қийин масала эканини таъкидлади.

"Бу ерларни қайта тиклашимиз керак бўлган қийин вақт келди, биз одамларни қайтаришимиз керак (ва уларнинг баъзилари аллақачон шаҳарда туғилган – муаммо бўлиши мумкин)”, дейди у.

Лукашенко бу иш кўп вақт ва катта меҳнат талаб қилишини таъкидлади. Унинг айтишича, Беларус бу йўналишда ёрдам беришга тайёр.

“Бирор нарсада ёрдам бера олсак, биз иштирок этамиз... Бу ерда ҳозир сизга ёрдам берадиганлар етарли, аммо биз бунда дўстона асосда қатнаша олсак... Ускуналар, қишлоқ хўжалиги шаҳарчалари, иш жойлари, маълум технологиялар (мутахассисларингиз, вазирларингиз бу технологияларни яхши билади) – агар улар мос бўлса, бизнинг ускуналаримиз шу ерда бўлса ва ишласа деймиз”, деб таъкидлайди Лукашенко.

У Илҳом Алиевдан розилик олганини қайд этди.

“Мен Илҳом Ҳайдаровичдан яккама-якка музокаралар чоғида сўрадим: агар иложи бўлса - Беларусь учун бирон бир жой, илтимос, бизга беринг. Илҳом Ҳайдарович эса бу ёндашувни қўллаб-қувватлади”, деган Александр Лукашенко.

“БелТА” хабарига кўра, ўтган йилнинг декабрь ойида Озарбайжон Президенти Санкт-Петербургдаги учрашувда Беларуснинг Қорабоғдаги инфратузилма объектларини модернизация қилиш ва қуришда иштирок этиш таклифини тасдиқлаган.

Маълумот учун, 2023 йил 19 сентябрда Озарбайжон Қорабоғда ҳарбий операция бошлади, унинг мақсадларидан бири тан олинмаган республиканинг барча органларини тарқатиб юбориш эди. Ереван бу ҳаракатларини босқинчилик сифатида баҳолаб, Қорабоғда арман бўлинмалари йўқлигини айтди. Бир кун ўтиб, Россия тинчликпарвар кучлари воситачилигида сулҳ шартлари орасида ўт очишни тўхтатиш, хусусан, арман тузилмаларини қуролсизлантириш тўғрисида келишувга эришилди. Шундан сўнг Қорабоғ ва Баку вакиллари ўртасида минтақани республика таркибига қўшишга бағишланган бир неча музокаралар бўлиб ўтди. Алиев Озарбайжоннинг ҳудудий яхлитлигини тиклаганини айтди.