Лос-Анжелесни ёқиб юборган яна 2 киши қўлга олинди (видео)

Лос-Анжелес полицияси Калифорниянинг Лос-Анжелес шаҳридаги энг йирик ёнғинда гумон қилинган икки кишини ҳибсга олди. Бу ҳақда кеча, 15 январь куни ABC News хабар берди.

Аниқлик киритилишича, қўлга олинганлардан бири ўт қўйганини тан олган. Унинг сўзларига кўра, у буни “ёнаётган баргларнинг ҳидини ёқтиргани” учун қилган. Иккинчи гумонланувчи ўт қўйиш сабаби ҳақида сўралганда, у ҳалокатли ва вайронгарчилик ишларини қилмоқчи эканини айтган.

“Ёнғин содир бўлган ҳудуд яқинидаги айрим ҳодисаларда ёнғинни келтириб чиқаргани учун яна икки киши ҳибсга олинди”, дейилади хабарда.

Канаданинг CBC News телеканали Лос-Анжелес полиция департаменти раҳбарига таяниб, 14 январь куни яна уч киши ўт қўйишда гумонланиб ҳибсга олингани ҳақида хабар берди.

Гумонланувчилардан бири барбекю олов ёндиргичи ёрдамида шаҳар ичида олов ёқмоқчи бўлган, яна икки нафари эса Ғарбий Лос-Анжелесдаги буталар ва ахлат қутисига ўт қўйгани учун ҳибсга олинган.

Лос-Анжелесдаги кўплаб ўрмон ёнғинлари 7 январь куни бошланган. Ёнғинни ўчириш давом этмоқда, кучли шамол ёнғинни кучайтирмоқда ва қутқарув гуруҳларида сув тугамоқда. Ёнғинлар туфайли штатда катта табиий офат эълон қилинди. 12,3 мингдан ортиқ бинолар вайрон бўлган. 9 январь куни бир киши Лос-Анжелесга ўт қўйишда гумонланиб ҳибсга олинди. У умрбод қамоқ жазосига маҳкум этилиши мумкин. Округдаги йирик ўрмон ёнғинлари камида 25 кишининг ҳаётига зомин бўлди.

Эслатиб ўтамиз, аввалроқ АҚШнинг Лос-Анжелес полицияси ўрмон ёнғинларига сабаб бўлганликда гумон қилинаётган шахсни қўлга олганди. Гумонланувчини қўлга олишда маҳаллий аҳоли ёрдам берган.