Лондонда Шекспирнинг уйи топилди

Лондон шаҳрида машҳур ёзувчи Уильям Шекспирга тегишли бўлган уй қаерда жойлашгани аниқланди, лекин  ўша уй бугунги кунга келиб сақланиб қолмаган. Бу ҳақда Лондон Қироллик коллежи матбуот хизмати хабар берди.

Тадқиқотчилар маълумотига кўра, Шекспир 1613 йилда, ўлимидан уч йил олдин Лондонда ягона мулкини сотиб олган. Бу уй ҳозирги Лондон маркази атрофида, тинч кўчада жойлашган бўлган.

Кембриж тадқиқотчиси Люси Манро эски архив ҳужжатларини ўрганиш орқали уйнинг аниқ жойлашувини аниқлаган. У 1668 йилда тузилган эски режа ва бошқа тарихий ҳужжатларни топиб, уй жойлашган ҳудудни топган. Бу ҳужжатлар Шекспир вафотидан кейин ҳам сақланиб қолган маълумотларга асосланган.

Аввал олимлар Шекспир 1613 йилда театр ёнғинидан кейин Лондондан кетиб, Стратфордга қайтган деб ўйлашган. Лекин янги топилмалар у Лондонда қолиб, театр ҳаётида фаол бўлганини кўрсатмоқда.

Уй Лондон ҳудудида, эски доминикан монастири яқинида жойлашган бўлган. Ҳозирги кунда у ерда XIX асрда қурилган бинолар турибди. Тахминий манзил сифатида Сент-Эндрюс-Хилл атрофидаги ҳудуд кўрсатилмоқда.

Тадқиқотчилар ҳатто ҳозирги кўчадаги кўк ёдгорлик плита айнан Шекспир уйи турган жойга ўрнатилганини ҳам аниқлаган.

Олимларнинг фикрича, бу кашфиёт Шекспир ҳаётининг сўнгги йиллари ҳақида янги тасаввур беради ва у Лондонда ўз ижодини давом эттирган бўлиши мумкинлигини кўрсатади.