“Ливерпуль” АПЛнинг энг қиммат ҳужумчиларидан бирини ўз сафига қўшиб олмоқчи

“Ливерпуль” “Ньюкасл” марказий ҳужумчиси Александр Исакнинг трансферига қизиқиш билдирмоқда. Бу ҳақда футбол журналисти Акром Конур Х саҳифасида маълум қилди.

Арне Слот шогирдлари мавсум охирида Дарвин Нуньесни алмаштиришни истамоқда ва трансфер мақсадларини аллақачон аниқлаб бўлган. 25 ёшли Исак “Ливерпуль”нинг асосий трансфер мақсадларидан бири.

Жорий мавсумда швециялик футболчи барча турнирларда 28 та ўйинда майдонга тушиб, 19 та гол урди ва 5 та голли узатмани амалга оширди. Футболчининг клуб билан амалдаги шартномаси 2028 йилнинг ёзига қадар тузилган. “Transfermarkt” порталида берилган маълумотларга кўра, футболчининг бозор қиймати 75 миллион еврони ташкил қилади.

Шунингдек, Исак хизматларига ҳамон Каталониянинг “Барселона” клуби қизиқиш билдирмоқда.

Эслатиб ўтамиз, аввалроқ “Барселона” “Ливерпуль”нинг нидерландиялик етакчиси Виржил ван Дейкни ўз сафига қўшиб олмоқчилиги хабар қилинганди.