Лео XIV АҚШ сайловларида овоз берган тарихдаги илк Рим папаси бўлди

Рим папаси Лео XIV АҚШда ўтказиладиган умумий сайловда овоз берган тарихдаги илк понтифик бўлди. У жорий йилнинг 3 ноябрь куни бўлиб ўтадиган оралиқ сайловларда почта орқали овоз берди. Бу ҳақда “Associated Press” хабар берди.

Ватикан Лео XIV сайлов бюллетенини юборганини тасдиқлаган. Ватикан матбуот хизматининг маълум қилишича, папа АҚШ фуқароси сифатида овоз бериш ҳуқуқидан фойдаланган. У аввал ҳам сайловларда қатнашиш имконияти бўлган пайтларда овоз берган. Жумладан, 20 йилдан ортиқ вақт давомида миссионер руҳоний ва епископ сифатида яшаган Перуда ҳам сайловларда қатнашган.

“Муқаддас Ота фуқароларнинг демократик жараёнларда иштирок этиш ҳуқуқи ва бурчига ишонади”, дейилади Ватикан баёнотида.

Лео XIVнинг асл исми Роберт Превост. У АҚШ ва Перу фуқаролигига эга. Шу билан бирга, Ватикан давлат раҳбари ҳам ҳисобланади. Ватикан мутлақ монархия бўлгани сабабли у ерда сиёсий сайловлар ўтказилмайди.

АҚШ қонунчилиги хорижда яшаётган фуқароларга, жумладан, бошқа давлат ҳукуматларида ишлаётган америкаликларга ҳам почта орқали овоз бериш имконини беради.

Лео XIV Иллинойс штатининг Нью-Ленокс шаҳрида рўйхатдан ўтган. У 3 октябрь куни почта орқали овоз бериш учун бюллетень сўраган. Бу ҳақда Уилл округи котиби аппарати раҳбари Ким Фладхаммер маълум қилган. 

Қайд этилишича, папа бу сўровни ўнг ўпкасидаги саратон ўсмасини олиб ташлаш бўйича операциядан 10 кун олдин юборган. У жорий йилнинг 17 октябрь куни шифохонадан чиқарилган ва шундан сўнг Ватикандаги фаолиятига аста-секин қайтган.

Унинг сайлов бюллетенини қандай юборгани ҳозирча номаълум.

Иллинойс штатидаги сайловларда сайловчилар губернатор Жей Би Притцкерни учинчи муддатга сайлаш ёки сайламаслик масаласини ҳал қилади. Шунингдек, узоқ йиллик сенатор Дик Дурбин истеъфога чиққани сабабли АҚШ Сенатидаги бўш ўрин учун ҳам овоз берилади.

АҚШ Президенти Дональд Трамп бу сайловда қатнашмайди. Бироқ у республикачилар Вакиллар палатаси ва Сенатдаги кўпчилик ўрнини сақлаб қолиши учун фаол ташвиқот олиб бормоқда.

Лео XIV папа этиб сайланганидан кейин АҚШ Президенти Дональд Трамп билан бир неча бор очиқ тортишган. Рим папаси АҚШ ва Исроилнинг Эронга қарши урушини танқид қилган, шунингдек, Трамп маъмуриятининг муҳожирларга қарши сиёсати ва оммавий депортациялар фонида уларга муносиб муносабатда бўлишга чақирган.

Эслатиб ўтамиз, аввалроқ Рим папаси Лео XIVда ўпка саратони аниқланганди. Рим папаси ўпкасида ўтказилган жарроҳлик амалиётидан сўнг жорий йилнинг 17 октябрь куни шифохонадан чиқиб, Ватиканга қайтганди.