“Labubu” ўйинчоғи асосчиси дунёнинг энг бой 100 кишиси рўйхатига кирди

Хитойдаги Pop Mart ўйинчоқлар дўконлари тармоғи эгаси, “Labubu” ўйинчоқлари ишлаб чиқарувчиси Ван Нинг “Bloomber Billionaires Index” рейтингида дунёнинг энг бой 85-одами бўлди. Бу ҳақда ушбу нашр маълумотларида келтирилган.  

Рейтингга кўра, унинг бойлиги 26,5 миллиард долларга баҳоланмоқда. Йил бошидан буён Ван Нингнинг капитали 18,8 миллиард долларга кўпайган.

Маълумот учун, 10 йил аввал гонконлик дизайнер Касинг Лунг ўзининг “The Monsters” китоби учун “Labubu” қаҳрамонини ўйлаб топган. Тишлари ўткир ва қулоқлари катта бўлган бу элф дарҳол мухлислар орасида машҳурликка эришган. 2019 йилда Pop Mart компанияси турли рангдаги “Labubu” осма ўйинчоқларини ишлаб чиқара бошлаган. Ўйинчоқлар “сюрприз-бокс”ларда сотилган, яъни харидор охирги дақиқагача унга қайси ўйинчоқ тушганини билмаган. Бу усул савдони кескин оширган ва одамлар бутун коллекцияни йиғиш учун имкон қадар кўпроқ бокс сотиб ола бошлаган. Бугунги кунда шу тариқа “Labubu” ўйинчоғи машҳурликка эришди.

Қайд этиш жоиз, дунёнинг энг бой кишилари рейтингида биринчи ўринни америкалик тадбиркор Илон Маск эгаллаб турибди. Унинг бойлиги 386 миллиард долларга баҳоланмоқда. Иккинчи ўринда – Oracle корпорацияси асосчиси Ларри Эллисон (289 миллиард доллар). Эътиборлиси шундаки, йил бошидан буён Эллисон ўз бойлигини 96,4 миллиард долларга оширган. Учинчи ўринда – Meta компанияси ҳамасосчиси Марк Цукерберг (262 миллиард доллар), у йил бошидан бери 55,2 миллиард долларга бойиган.

Биринчи бешликка, шунингдек, Amazon компанияси асосчиси, Blue Origin аэрокосмик компанияси эгаси Жефф Безос (250 миллиард доллар) ва Google’нинг бош компанияси Alphabet ижрочи директори (CЕО) Ларри Пейж (185 миллиард доллар) ҳам кирди.

Эслатиб ўтамиз, аввалроқ “Bloomberg Billionaires Index”ида жорий йил бошидан бери россиялик тадбиркор ва миллиардер Алишер Усмоновнинг бойлиги 3,12 млрд долларга кўпайгани хабар қилинганди.