Курскдаги мактабга зарба берилди. Москва ва Киев бир-бирини айбламоқда

Жорий йил 1 февраль куни Украина Қуролли кучлари томонидан эгалланган Россиянинг Курск вилояти Суджа шаҳридаги тинч аҳоли вакиллари яшаётган интернат-мактабга зарба берилди. Оқибатда 4 киши ҳалок бўлди. Бу ҳақда Украина Бош штаби хабар берди.

Ҳарбий идора хабарига кўра, 1 февраль куни маҳаллий вақт билан соат 17:54 да Россия ҳарбий самолёти интернатга махсус бошқариладиган авиабомба (КАБ) ташлаган. Бинода фақат тинч аҳоли вакиллари, жумладан, аёллар ва болалар бўлган. Ҳужум оқибатида тўрт киши ҳалок бўлган, яна тўрт киши оғир яраланган.

Маълум қилинишича, зарба вақтида интернатда эвакуацияга тайёргарлик кўраётган 84 киши ва тўрт нафар украиналик полициячи бўлган. Авиация ҳужуми оқибатида бинонинг марказий қисми бутунлай вайронага айланган. Ярадорлар Украинага олиб кетилган.

“Россия айнан шундай уруш олиб бормоқда – Суджа, Курск вилояти, Россия ҳудуди, тинч аҳолиси бўлган интернат, эвакуацияга тайёрланаётган одамлар. Россия авиабомбаси. Улар тинч аҳолининг борлигини билиб, бинони вайрон қилди”, деб ёзди Украина Президенти Владимир Зеленский ҳодиса жойидан олинган видеони ижтимоий тармоқдаги саҳифасида эълон қилиб.

Россия Мудофаа вазирлиги эса интернатни айнан Украина Қуролли кучлари Суми вилоятидан отган ракеталар билан нишонга олганини даъво қилган. Россия ҳарбий идорасининг баёнотида айтилишича, буни ҳаво ҳужумидан мудофаа тизимлари қайд этган. Россия Мудофаа вазирлиги бу зарбани Украина томонидан уюштирилган провокация деб атаб, эътиборни Русское Поречное қишлоғидаги воқеалардан чалғитишга уриниш сифатида баҳолаган. Россия Тергов қўмитаси маълумотига кўра, ушбу қишлоқда Украина ҳарбийлари 11 нафар эркак ва 11 нафар аёлни ўлдирган.

Россия Мудофаа вазирлиги интернатга ҳужум юз бергани ҳақида аниқ далиллар тақдим этмаган. Россиялик ҳарбий блогерлар эса Суджада ҳаво тревогаси эълон қилингани ва Суми вилоятидан тўртта ракета учирилгани ҳақида хабар берган. Шунингдек, Россиянинг "Север" ҳарбий гуруҳига тегишли ижтимоий тармоқ саҳифаси Суджага Америка ишлаб чиқарган HIMARS реактив тизимидан зарба берилгани тасвирланган видеони эълон қилган. Ушбу саҳифада “об-ҳавонинг ёмонлиги сабаб Россия авиацияси Суджа ҳудудида ишламаган”, деб ёзилган. Бироқ 1 февраль куни Россия Мудофаа вазирлигининг ўзи Курск вилоятидаги Украина позицияларига, жумладан, Суджа шаҳрига авиация зарбалари берилганини тасдиқлаган.

Россия Тергов қўмитаси Украина Қуролли кучларининг 19-алоҳида ракета бригадаси командири, полковник Ростислав Карпушага қарши жиноят иши очган. Терговчиларнинг тахминича, айнан у интернатга зарба бериш буйруғини берган. Украина ҳаво кучлари эса бунга жавобан “Вираж-планшет” кузатув тизимининг скриншотларини тақдим этиб, унда интернатга ташланган Россия авиабомбасининг траекторияси акс этгани даъво қилинган.

Курск вилояти губернатори Александр Хинштейн Россия Мудофаа вазирлиги версиясини такрорлаган ва жабрланганлар сони бўйича аниқ маълумот йўқлигини таъкидлаган. Дастлаб Украина ҳарбий комендатураси интернатда 95 нафар тинч аҳоли вайроналар остида қолганини билдирган. Бу бино асосан Курск вилоятидан бўлган қариялар, беморлар ва уруш оқибатида уйидан айрилган одамлар учун бошпана сифатида фойдаланилган.

Маҳаллий аҳолининг айтишича, интернатда эвакуацияга тайёргарлик кетаётган эди. Улар дастлаб Суми орқали Беларусга, кейин Россияга қайтарилиши режалаштирилган эди. Аввалроқ ҳам ҳудуддан 46 нафар қочқин худди шундай йўл билан эвакуация қилинган.

Интернат Суджа шаҳрида илгари ҳам зарбага учраган. Жорий йил 11 январь куни Россия авиацияси бинога ҳужум қилган, оқибатда бир нафар маҳаллий аёл ҳалок бўлган, яна олти киши жароҳатланган. 12 январь куни Россия Мудофаа вазирлиги Суджада Украина ҳарбий кучларини йўқ қилганини эълон қилган, аммо интернатга зарба берилганига оид ҳеч қандай изоҳ бермаган. Январь ойининг ўрталарида Россия дронлари ушбу интернатга озиқ-овқат ва дори-дармон етказиб бераётган икки автомобилни нишонга олганини ҳам эълон қилган.

Эслатиб ўтамиз, аввалроқ Россиянинг Украина пойтахти Киев марказига қилган дрон ҳужуми оқибатида уч киши ҳалок бўлган эди. Киев мэри Виталий Кличко шаҳар атрофида ҳаво мудофааси тизимлари ишга туширилганини маълум қилган. Шевченкивский туманида деразалар синиб кетгани, шу жумладан, метро бекатига ҳам зарар етгани қайд этилган. Яна бир хонадон биносидан тутун чиқаётгани ва сув қувури зарар кўргани ҳақида хабар берилган.