Коронавирус Ўзбекистон қамоқхоналарига ҳам кириб бордими?

Ўзбекистон қамоқхоналарида сақланаётган маҳкумларнинг 9 фоизи коронавирусга чалиниб, даволанган. Бу ҳақда Ички ишлар вазирлиги Жазони ижро этиш Бош бошқармаси даволаш профилактика ёрдамини ташкиллаштириш бўлими бошлиғи Баҳодир Юсупов АОКАда бўлиб ўтган матбуот анжуманида маълум қилди.

Унинг айтишича, дастлабки 4 ой давомида жазони ижро этиш муассасаларида коронавирус билан касалланган беморлар аниқланмаган.

“Жазони ижро этиш муассасаларида сақланаётган маҳкумларнинг ўртача 9 фоизга яқини касалликни бошдан кечирди. Коронавируснинг енгил шаклини муассасаларнинг ўзида даволадик. Бироқ ўрта оғир ёки оғир шаклларини Соғлиқни сақлаш вазирлиги тасарруфидаги 4 та ҳудудда – Бухоро, Қашқадарё, Навоий ва Тошкент вилоятларидаги соғлиқни сақлаш муассасаларида даволадик. Лекин бирорта ўлим билан боғлиқ ҳолат юз бермади”, дейди Баҳодир Юсупов. 

Шунингдек, у Қашқадарё ва Бухоро вилоятларидаги қамоқхоналарда сақланаётган коронавируснинг ўта оғир шакли билан касалланган 2 нафар шахс Жиноят кодексининг 75-моддаси ва Жиноят-ижроия кодексининг 165-моддасига асосан муддатидан аввал озод қилингани айтиб ўтди.