Конгресс Россияга қарши жиддий ҳужжат устида ишлаяпти

АҚШ Конгресси Оқ уй билан биргаликда Россияга “тажовузкор давлат” мақомини беришга имкон берувчи қонун лойиҳаси устида фаол ишламоқда. Бу ҳақда “The Hill” газетаси Капитолийдаги манбаларига таяниб хабар берди. 

Нашрнинг ёзишича, бундай мақомнинг берилиши Оқ уйнинг Украина Президенти Владимир Зеленский талаб қилганидек, Россияни терроризмга ҳомийлик қилувчи давлатлар рўйхатига киритишни истамаслиги фонида ярим чора ҳисобланади. Шу билан бирга, Америка қонунчилигида "тажовузкор давлат" атамаси мавжуд эмас, бу эса ҳуқуқий актни қонуний жиҳатдан ишлаб чиқишни қийинлаштиради. 

Айни дамда ҳужжат матни АҚШ Президенти маъмурияти билан келишиб олинмоқда ва қонунчилар уни имкон қадар тезроқ Конгрессга тақдим этиш ниятида. “The Hill” нашрининг ёзишича, қонун лойиҳаси кўриб чиқилгач, у АҚШ Президентига “Украинага қарши тажовузкорлик актида иштирок этаётган бўлса” ҳар қандай хорижий давлатга нисбатан шахсан “тажовузкор давлат” мақомини бериш ҳуқуқини беради. Бундан ташқари, давлат раҳбари жисмоний шахслар бундай хатти-ҳаракатларга “масъулиятли, иштирок этган ёки шерик бўлган” бўлса, уларга нисбатан жазо чораларини қўллаши мумкин бўлади. 

АҚШ Давлат котиби Энтони Блинкен аввалроқ Жо Байден маъмурияти Россия Федерациясининг терроризмга ҳомийлик қилувчи давлатлар рўйхатига киритилишига олиб келадиган салбий оқибатларга йўл қўймаслик учун Конгрессдаги қонунчилар билан Россияга босимни кучайтириш устида иш олиб бораётганини айтганди. 

Оқ уй сентябрь ойида Россияни АҚШнинг терроризмга ҳомийлик қилувчи давлатлар рўйхатига киритмаслик ҳақидаги қарори АҚШ маъмуриятининг якуний тўхтами эканлигини таъкидлади. Киев Вашингтондан Россияни ушбу рўйхатга қўшишни сўраган. Шу каби таклифлар Конгресснинг бир қатор аъзолари томонидан ҳам билдирилган. Россия Ташқи ишлар вазирлиги матбуот котиби Мария Захарова бу ташаббусларни "аҳмоқона ўлчов" деб атади ва АҚШнинг бундай ҳаракатлари Москва томонидан жавобсиз қолмаслигидан огоҳлантирди. 

Ушбу рўйхатга Вашингтон фикрича, “халқаро террорчилик ҳаракатларини қайта-қайта қўллаб-қувватлаган” давлатлар киритилиши мумкин. Америка маъмурияти рўйхатдаги шахсларга нисбатан санкциялар қўллаш нуқтаи назаридан кенг ваколатларга эга. АҚШ Ғазначилик департаменти ушбу юридик ва жисмоний шахсларга, шунингдек, рўйхатдаги мамлакатлар билан савдо қилувчи штатларга қарши чоралар кўриши мумкин. Рўйхатга ҳозирда Эрон, Шимолий Корея, Куба ва Сурия киритилган.