Кон-геология фаолиятини назорат қилиш Марказий минтақавий инспекцияси бошлиғи ишдан кетказилди

Давлат геология ва минерал ресурслар қўмитаси ҳузуридаги Кон-геология фаолиятини назорат қилиш инспекцияси ходимлари томонидан “STAR ALFA PROGRES” МЧЖ фаолиятида текширув ўтказиш тартиби бузилганлиги аниқланди. Бу ҳақда Бизнес-Омбудсман матбуот хизмати хабар бермоқда.

Ушбу ҳолат юзасидан Бизнес-омбудсман девони томонидан текширув тартибини бузган шахсларга нисбатан тегишли таъсир чоралар қўлланилган. Ўтказилган текширув давомида расмийлаштирилган далолатнома ва текширув ўтказиш тўғрисидаги буйруқ бекор қилинган.

Кон-геология фаолиятини назорат қилиш инспекцияси бошлиғи О.З. га нисбатан жарима интизомий жазоси қўлланилган. Кон-геология фаолиятини назорат қилиш Марказий минтақавий инспекцияси бошлиғи А.Ж. эгаллаб турган лавозимидан озод этилган. Кон-геология фаолиятини назорат қилиш Марказий минтақавий инспекцияси бош ва етакчи инспекторлари С.Ш. ва С.А. ларга нисбатан маъмурий ҳуқуқбузарлик тўғрисидаги баённома расмийлаштирилиб, ушбу шахслар суд томонидан ҳуқуқбузар деб топилган.