Киркни ўлдиришда гумонланаётган 22 ёшли йигит ким?

АҚШнинг Юта штатида консерватив фаол, Президент Дональд Трампнинг ашаддий тарафдори Чарли Киркни ўлдиришда гумонланаётган 22 ёшли Тайлер Робинсон ҳибсга олинди. Бу ҳақда CNN хабар берди.

Расмийлар Киркнинг ўлдирилишини “сиёсий суиқасд” деб тасвирлар экан, ҳодиса жойида топилган милтиқ ва ўқ-дориларда антифашистик хабарлар ўйиб ёзилганини аниқлади. Робинсон ишлатган ва университет яқинидаги ўрмонзорга ташлаб кетган милтиқнинг ўқ гильзаларидан “О белла чао, белла чао, белла чао, чао, чао” деган сўзлар топилган бўлиб, бу италянча антифашистик қўшиққа ишора қилади.

“Унинг оила аъзоларидан бири терговчиларга Робинсон сўнгги йилларда кўпроқ сиёсийлашгани ва айниқса, Киркка қарши чиққани ҳақида айтган”, деди Юта штати губернатори Спенсер Кокс бугун, 12 сентябрь куни ўтказилган матбуот анжуманида.

Кокснинг айтишича, 11 сентябрь кечаси Робинсоннинг қариндошларидан бири оилавий дўстига мурожаат қилган ва ўша дўст Вашингтон округи шерифи идорасига хабар берган. Робинсон “яқинларига жиноятни содир этганини тан олган ёки шунга ишора қилган”.

Кокснинг сўзларига кўра, Робинсоннинг қариндошларидан бири терговчиларга яқиндаги оилавий кечки овқатда у Киркнинг Юта Водийсида бўлиб ўтадиган тадбири ҳақида гапирганини, “Киркни нега ёқтирмаслигини ва унинг қарашлари ҳақида мунозара қилганини” айтган. 

ФҚБ директори Каш Пателнинг таъкидлашича, Робинсон кеча, 11 сентябрь куни кечки соат 10:00 атрофида, 33 соатлик қидирувдан сўнг қўлга олинган.

Сайлов рўйхатларига кўра, Робинсон партияга аъзо бўлмаган сайловчи сифатида қайд этилган, лекин у “фаол бўлмаган” сайловчи сифатида кўрсатилган – яъни, охирги икки умумий сайловда овоз бермаган.

Робинсон Юта штатидаги Вашингтон шаҳрида ўсган ва Робинсон 2021 йилда Сент-Жорждаги Pine View мактабини тугатган. У ўрта мактабдаги яхши таълим натижалари учун Юта Давлат Университетига грант ютиб олган, аммо университетда бир семестрдан кейин ўқишни ташлаб кетган.

Ижтимоий тармоқдаги суратларда Робинсон сўнгги пайтда полиция тарқатган гумонланувчи тасвирларидаги каби кулранг Converse оёқ кийими ва кўзойнак таққани кўринади.