ХЖС АҚШга жавоб қайтарди

Нидерландиянинг Гаага шаҳрида жойлашган Халқаро жиноий суд (ХЖС) АҚШ томонидан ўз судьяларига нисбатан жорий этилган санкцияларни танқид қилиб чиқди ва бу ҳолат суднинг мустақиллигига таҳдид эканини таъкидлади. Бу ҳақда суднинг расмий сайтида хабар берилди.

Гап АҚШнинг ХЖС Апелляция палатасининг тўрт судьясига қарши киритган санкциялари ҳақида бормоқда. Бу судьялар Исроил Бош вазири Биньямин Нетаньяху ва собиқ мудофаа вазири Йоав Галантга нисбатан чиқарилган ҳибсга олиш ордерларига қарши шикоятларни кўриб чиқмоқда. Санкция эълон қилинган судьялар Бенин, Уганда, Перу ва Словения фуқаролари ҳисобланади. 

“Адолат учун курашаётган инсонларга қарши ҳужумлар можаролардан азият чекаётган тинч аҳолига фойда келтирмайди. Аксинча, бундай чора-тадбирлар жазосизликка умид қилаётганларни рағбатлантиради”, дейилади баёнотда. 

Суд АҚШнинг ҳаракатларини суд ишларига бевосита аралашув деб атаган ва бу ҳолат 125 давлат томонидан тасдиқланган халқаро суд тизимининг мустақиллигига путур етказишини айтган.

Санкциялар фақатгина алоҳида судьяларга эмас, балки ХЖС тузилмасининг ўзига ҳам – ходимлари, суд фаолиятини қўллаб-қувватлаётган шахслар ва иштирокчи давлатларнинг фуқароларига ҳам хавф туғдиришини таъкидланган. Шунга қарамай, суд Рим статутига асосланиб ишлашда давом этиши ва геноцид, уруш жиноятлари, инсониятга қарши жиноятлар ва агрессия қурбонлари учун адолатни таъминлашни ваъда қилган.

Қолаверса, Нидерландия ва Словения ҳам АҚШ ҳаракатларини танқид қилган. Нидерландия Ташқи ишлар вазири Каспар Велдкамп мамлакат санкцияларни қўллаб-қувватламаслиги ва халқаро судларнинг мустақиллигини ҳимоя қилишини билдирган. У шунингдек, Нидерландия – ХЖС жойлашган давлат сифатида суд ишини узлуксиз давом эттиришини таъкидлаган.

Маълумот учун, ХЖС томонидан 2024 йилнинг 21 ноябрида Исроил Бош вазири Биньямин Нетаньяху ва собиқ мудофаа вазири Йоав Галантни Ғазода уруш жиноятлари ва инсониятга қарши жиноятлар содир этганликда айблаб, ҳибсга олиш учун ордер берилган. 

Эслатиб ўтамиз, аввалроқ Исроилнинг ўта ўнгчи Миллий хавфсизлик вазири Итамар Бен-Гвир Халқаро жиноий суд (ХЖС) томонидан ҳибсга олиниши мумкинлигидан қўрқмаслигини айтганди. Ўтмишда 50 дан ортиқ марта нафрат уйғотганликда айбланган ва бир пайтлар “ирқчилик”да айбланган Бен-Гвирнинг айтишича, Гаагадаги прокурор уни қўрқитмайди.