Хоманаий намойишларда минглаб одамлар ҳалок бўлганини тан олди

Эрон Олий раҳнамоси Оятуллоҳ Али Хоманаий Эронда бўлиб ўтган норозилик намойишлари чоғида минглаб одамлар ҳалок бўлганини илк бор тан олди. Бироқ у уларнинг ўлимида АҚШни айблади. Бу ҳақда у телеведение орқали йўллаган мурожаатида сўз очди.  

“Исроил ва АҚШ билан алоқаси бўлганлар катта зарар етказди ва бир неча минг одамни ўлдирди… Биз АҚШ Президентини Эрон халқига етказилган қурбонлар, зарар ва туҳматлар учун масъул бўлган жиноятчи деб ҳисоблаймиз”, дейди Хоманаий.

Унинг айтишича, АҚШ Президенти Дональд Трамп норозилик намойишлари иштирокчиларини қўзғатган, жумладан, уларга ҳарбий ёрдам беришни ваъда қилган.

Эрон Олий етакчиси, шунингдек, намойишларда қатнашган шахслар хориждан келтирилган жанговар қуроллар билан қуролланганини маълум қилган, бироқ бу қуроллар қайси давлатдан келганига аниқлик киритмаган. Хоманаий мамлакат ҳукумати нафақат норозиликларда қатнашганларни, балки уларни қўзғатган шахсларни ҳам жавобгарликка тортиш ниятида эканини билдирган.

“Биз мамлакатни урушга олиб бормаяпмиз. Аммо ички ҳуқуқбузарларни жазодан озод қилмаймиз, бундан ҳам ёмони – халқаро ҳуқуқбузарлар ҳам бор. Биз уларни ҳам тинч қўймаймиз”, дейди у.

АҚШда жойлашган эронлик ҳуқуқ ҳимоячиларининг маълумотларига кўра, Эрондаги норозилик намойишларини шафқатсиз бостириш оқибатида уч мингдан ортиқ одам ҳалок бўлган. Айрим бошқа ҳуқуқ ҳимоячилар эса қурбонлар сони анча кўп эканини айтмоқда. Эрондан ишончли маълумот олиш мамлакатда интернет блоклангани сабабли қийинлашган.

Эслатиб ўтамиз, аввалроқ Эроннинг айрим ҳудудларида иқтисодий инқироз фонида бошланган оммавий норозилик намойишлари давом этаётган бир пайтда интернетга уланиш қисман тиклангани ҳақида хабар берилган эди.