Хоманаий АҚШга таҳдид қилди

Эрон Олий раҳбари Оятуллоҳ Али Хоманаий АҚШ томонидан Эронга ҳужум қилинадиган бўлса, уруш минтақавий тус олиши ҳақида огоҳлантирди. У бу ҳақда кеча, 1 февраль куни Теҳрондаги қароргоҳидан халққа мурожаат қилиб, Ислом инқилобининг 47 йиллиги муносабати билан сўзлаган нутқида айтди.

Хоманаийнинг сўзларига кўра, америкаликлар шуни билиб қўйиши керакки, агар улар уруш бошласалар, бу сафар можаро фақат икки давлат билан чекланиб қолмайди, балки бутун минтақага ёйилади.

У АҚШ маъмурияти томонидан вақти-вақти билан янграйдиган уруш ҳақидаги баёнотлар, ҳарбий самолётлар ва кемалар тилга олиниши янги ҳолат эмаслигини таъкидлаган. Хоманаийнинг айтишича, илгари ҳам америкаликлар бир неча бор таҳдид қилган, “барча вариантлар стол устида”, жумладан ҳарбий йўл ҳам борлигини айтишган.

Шу билан бирга, у Эрон уруш бошлаш тарафдори эмаслигини ва ҳеч бир давлатга ҳужум қилиш нияти йўқлигини айтган. Аммо агар кимдир Эронга ҳужум қилиб, зарар етказса, Эрон халқи бунга жуда қаттиқ жавоб беришини таъкидлаган.

Хоманаий мамлакатда бўлиб ўтган кўча намойишлари воқеаларини давлат тўнтаришига уринишга ўхшатган. Унинг сўзларига кўра, юз берган тартибсизликлар тўнтаришга ўхшаш бўлган ва у барбод этилган. У бу ҳаракатларнинг мақсади мамлакатни бошқарувчи муҳим ва таъсирли марказларни йўқ қилиш бўлганини айтган.

Шу сабабли, намойишлар чоғида ҳужумлар полиция бўлимларига, давлат муассасаларига, Ислом инқилоби қўриқчилари корпуси штабларига, банкларга ва масжидларга қаратилганини, Қуръон ёқиб юборилганини айтган. Хоманаийнинг фикрича, бу ҳаракатлар мамлакатни бошқарувчи марказларга зарба беришга қаратилган бўлиб, давлат тўнтаришига уринишни эслатган.

Эслатиб ўтамиз, аввалроқ Эрон Ҳормуз бўғозида икки кунлик ҳарбий машғулотлар бошланишини эълон қилганди. Бу машғулотлар минтақада ҳаракатланаётган АҚШ техникалари яқинида ўтказилиши режалаштирилган. АҚШ Қуролли кучларининг Яқин Шарқдаги Марказий қўмондонлиги Эрон ҳарбийларига огоҳлантириш билан чиққан. Унда АҚШ томони америкалик ҳарбий кемалар устидан хавфли парвозлар ёки Эрон катерларининг тўқнашув йўналишида яқинлашуви каби маневрларга йўл қўйилмаслигини таъкидлаган.