Ходим Елисей саройидан идиш ўғирлаб, интернетда сотди

Ўтган ҳафтада Франция Президенти Эммануэль Макроннинг расмий қароргоҳи – Елисей саройи ходими қўлга олинди. У кумуш ва чинни идишларни ўғирлашда айбланмоқда. Ўғирланган буюмларнинг умумий қиймати 40 минг еврога баҳоланмоқда. Шунингдек, унинг икки нафар шериги ҳам ҳибсга олинган. Бу ҳақда Париж прокуратурасига таяниб, “The Guardian” хабар берди.

Тергов версиясига кўра, коллекцияларни сақлаш учун масъул бўлган эркак узоқ вақт давомида буюмларни, асосан миллий мерос ҳисобланган Севра корхонаси (қироллик ва давлат учун мўлжалланган нафис чинни буюмлар ишлаб чиқаради) чинниларини яширинча ўғирлаб. Учлик ўғирланган буюмларни онлайн платформалар орқали сотишга уринган. 

Ҳодиса Севра корхонаси мутахассислари томонидан фош этилган. Улар интернетда ноёб буюмларни пайқаб қолган. Тинтувлар чоғида гумонланувчилардан қарийб 100 та буюм топилиб, саройга қайтарилган. Улар орасида Севра чиннилари, “Baccarat” кристалл буюмлари ва “Lalique” устахонасига мансуб асарлар ҳам бор.

Айбланувчиларга 10 йилгача озодликдан маҳрум этиш жазоси таҳдид қилмоқда. Суд мажлиси 2026 йил 26 февралга белгиланган.

Эслатиб ўтамиз, жорий йилнинг 19 октябрь куни иш вақти давомида ниқоб кийган жиноятчилар Луврга кириб, императорлик коллекциясига мансуб тўққизта экспонатни, жумладан, Наполеон ва унинг рафиқаси Жозефинага тегишли заргарлик буюмларини ўғирлаган эди. Ўғриликдан етган зарар 88 миллион еврога баҳоланган.

Воқеадан Бир ҳафта ўтиб, Луврдан заргарлик буюмларини ўғирлашда гумон қилинаётган тўрт кишидан икки нафари қўлга олинган. Улардан бири Париждаги Руасси – Шарль-де-Голл аэропортида, Жазоирга учадиган самолётга чиқиш пайтида ҳибсга олинган. Иккинчиси эса Сена-Сен-Дени департаментида қўлга олинган.