Халқаро фан олимпиадаси ғолибларига бериладиган мукофот пули 5 карра оширилади

Энди нуфузли халқаро фан олимпиадаларида совринли ўринларни қўлга киритган ўқувчилар учун бир марталик пул мукофоти миқдори 5 карра оширилади. Бу ҳақда 14 февраль куни Кўксарой қароргоҳида Президент Шавкат Мирзиёев ёшлар билан ўтказган мулоқотида маълум қилди. 

Қайд этилишича, Президент томонидан ёшлар билан ишлаш натижадорлигини янада ошириш, уларга янада кенг имкониятлар яратиш чора-тадбирлари муҳокама қилинган.

Мирзиёев нутқи давомида нуфузли халқаро фан олимпиадаларида ғолиб ва совриндор бўлганлар учун бир марталик пул мукофоти миқдори 5 карра оширилишини билдирган.

Қолаверса, Президент дунёнинг нуфузли “топ-100” олийгоҳларида илмий даража олган 35 ёшгача бўлган ёш олимларга уй-жой учун 10 йил муддатга 800 млн сўмгача фоизсиз ссуда ажратилиши ҳақида ҳам қўшимча қилган.

Маълумот учун, шу давргача халқаро фан олимпиадаларида соврин қўлга киритган ўқувчиларга 187 млн сўм берилган. Ғолибларга пул мукофот бериш 2019 йилдан йўлга қўйилган. Шунингдек, ғолибларнинг ўқитувчилари ҳам 168 млн сўм мукофот олиб келмоқда.

Эслатиб ўтамиз, 14 февраль куни Кўксарой қароргоҳида Президент Шавкат Мирзиёевнинг Ўзбекистон ёшлари билан ўтказган мулоқотида Ўзбекистонда камбағал оила фарзандига қўшимча грант ажратилиши, контракт тўловининг бир қисми қоплаб берилиши ҳақида гапирганди.