Кашмирдаги тўқнашувларда 11 киши ҳалок бўлди

Покистон назоратидаги Кашмирда эртага, 9 июнь кунига белгиланган намойишлар арафасида юз берган тўқнашувлар оқибатида 11 киши ҳалок бўлди, 70 нафардан ортиқ киши жароҳат олди. Бу ҳақда “Reuters” хабар қилди.

Маълум қилинишича, полиция ва ярим ҳарбий кучлар фуқаролик жамияти ташкилотлари альянсининг тақиқланган бирлашмаси томонидан уюштирилган норозилик акцияси иштирокчиларини тарқатишга уринган. 

Полиция маълумотига кўра, иқтисодий ва сиёсий ҳуқуқларни ҳимоя қилишни талаб қилиб келаётган Бирлашган халқ ҳаракати қўмитаси (JAAC) аъзолари полиция ўқ узиши оқибатида ҳалок бўлган ҳаракат иштирокчисининг жасади олиб борилган шифохона олдига тўпланган.

“Тартибсизлик чиқарганларнинг ўқ узиши оқибатида тўрт нафар полиция ходими ва бир йўловчи ҳалок бўлди. Ҳуқуқни муҳофаза қилувчи органларнинг жавоб ҳаракатлари оқибатида эса олти нафар намойишчи ўлдирилди”, дейди минтақанинг Пунч сектори комиссари Сардор Воҳид Хон.

Полиция бошлиғи Лиақат Маликнинг айтишича, кеча, 7 июнь кунги воқеада 23 нафар хавфсизлик ходими ва 50 нафар намойишчи жароҳат олган. Ҳиндистон билан баҳсли ҳудуд ҳисобланган Ҳимолай минтақасида 30 нафар қонунбузар қўлга олинган.

“Давлат Равалакотда халқимизга қарши қирғин бошлади”, дейди JAAC етакчиларидан бири Шавкат Навоз Мир Х ижтимоий тармоғида эълон қилган видео мурожаатида.

У воқеа содир бўлган туманни назарда тутар экан, ҳаракат 9 июнь кунига режалаштирилган иш ташлаш акциясини амалга ошириш учун бирдамлигини сақлаб қолишини таъкидлаган.

“JAAC раҳбарияти бу воқеани қирғин деб атаб, жамоатчиликни чалғитмоқда. Давлатнинг ҳаракатлари қонун ва тартибни тиклашга қаратилган эди”, дейди Сардор Воҳид Хон бунга жавобан.

Унинг айтишича, хавфсизлик кучлари намойишчиларни тарқатишга уринганида, ҳаракат фаоллари автомат қуроллар, бензинли бомбалар ва бошқа қуроллардан фойдаланиб, уларга ҳужум қилган.

Маълумот учун, JAAC жорий йил 27 июль куни ўтказилиши режалаштирилган минтақавий қонунчилик органи сайловларидаги 45 ўриндан 12 таси қочқинлар учун ажратилганига қарши норозилик сифатида иш ташлаш акциясини эълон қилган. Альянс Озод Жамму ва Кашмир Қонунчилик ассамблеясидаги ушбу квота ўринларини бекор қилишни талаб қилмоқда. Уларнинг таъкидлашича, мазкур ўринлар учун Кашмирда эмас, балки Покистоннинг бошқа ҳудудларида яшовчи номзодлар курашмоқда.

Сўнгги икки йил давомида JAAC раҳбарлигида ун ва электр энергияси нархларининг ошишига қарши ўтказилган оммавий намойишлар ҳам ҳаракат тарафдорлари ва хавфсизлик кучлари ўртасидаги тўқнашувлар ортидан қурбонлар билан якунланган эди.

5 июнь куни минтақавий ҳукумат терроризмга қарши қонун асосида JAAC’ни тақиқланган ташкилот деб эълон қилган ҳамда маҳаллий ва хорижий сайёҳларга 9 июнга қадар минтақани тарк этишни тавсия қилган.

Эслатиб ўтамиз, 6 июнь куни Ҳиндистон пойтахти Нью-Деҳли марказида ўзини “Тараканлар” партияси деб атаётган ҳаракатнинг юзлаб тарафдорлари йирик намойиш уюштирган эди.