Капиталнинг, илғор ғоянинг ва ҳалол меҳнатнинг миллати йўқ! – Шавкат Мирзиёев

Капиталнинг, илғор ғоянинг ва ҳалол меҳнатнинг миллати йўқ. Бу ҳақда бугун, 12 октябрь куни Президент Шавкат Мирзиёев Янги Тошкент қурилишини жадаллаштириш масалалари юзасидан инвестор ва тадбиркорлар билан ўтказилтган очиқ мулоқотда гапирди.

Мулоқотда Президент сармоядорларни “хорижлик” ва “маҳаллий” деб ажратишга муносабат билдирган.

“Капиталнинг, илғор ғоянинг ва ҳалол меҳнатнинг миллати йўқ!”, дейди давлат раҳбари ва Ўзбекистон иқтисодиёти учун янги ғоя – “ЎЗ” фалсафасини илгари сурган.

“ЎЗ” – Ўзбекистон, Ўзгариш, Ўзлик ва Масъулият дегани. Кимки Ўзбекистонга сармоя киритиб, замонавий технология олиб келса ва одамларга иш ўрни яратса, қайси мамлакат ёки шаҳардан келганидан қатъи назар, умумий тараққиётга ҳисса қўшади.

«Кимки Янги Тошкентни ёки Ширинни биз билан бирга қурса, демак, у тўлақонли ўзимизники!» дейди Президентимиз.

Сармоядорларнинг мулки ва бизнеси қонун, давлат ва шахсан ўзининг қатъий ҳимоясида бўлишини қайд этган. Шундан сўнг, Президент инвесторлар билан мулоқот қилган. Учрашувда билдирилган таклифлар эътиборсиз қолмаслиги, тез кунларда тегишли қарор қабул қилиниши айтилган. Мамлакат етакчиси бир ойдан сўнг Янги Тошкентга яна бориб, берилган топшириқлар ижросини кўриб чиқишини таъкидлаган.

Якунда давлат раҳбари инвестор ва тадбиркорларни “Ўз ғоянг! Ўз сармоянг! Ўз келажагинг! Янги Ўзбекистон, Янги Тошкент – ўзимизники!” деган янги шиор атрофида бирлашишга чақирган. Янги Тошкентда мамлакат учун муҳим бўлган кўплаб ўзига хос лойиҳалар амалга оширилишига ишонч билдирган.