Канселу “Барселона”га қайтади – манба

Испаниянинг “Барселона” жамоаси португалиялик ҳимоячи Жоау Канселунинг “Ал-Ҳилол”дан трансфери бўйича келишувга эришди. Бу ҳақда таниқли журналист ва инсайдер Фабрицио Романо маълум қилди.

Манбага кўра, 31 ёшли футболчи 2025-2026 йилги мавсум охиригача ижара асосида Каталония клубига кўчиб ўтади. “Барселона” ушбу ижара учун Саудия Арабистони клубига 4 миллион евро тўлайди.

Қайд этилишича, Канселуга Италиянинг “Интер” клуби ҳам жиддий қизиқиш билдирган, бироқ португалиялик футболчи шахсан “Барселона” вариантини танлаган. Аввалроқ, ОАВда “нерадзурри” Канселуни қайтариш бўйича келишувга яқин экани ҳақида хабарлар тарқалган эди, аммо кейинчалик музокаралар тўхтаб қолган.

Жоау Канселу 2024 йил ёзидан буён “Ал-Ҳилол” сафида ҳаракат қилиб келмоқда. Жорий мавсумда у барча мусобақаларда олтита ўйинда майдонга тушиб, битта гол ва иккита голли узатмага муаллифлик қилди. Футболчининг Саудия клуби билан амалдаги шартномаси 2027 йил июнь охиригача мўлжалланган.

Маълумот учун, “Transfermarkt” портали ҳозирда Канселунинг бозор қийматини 10 миллион еврога баҳоламоқда.