Камилла Раҳимова Ўзбекистоннинг биринчи ракеткачисига айланди

Халқаро аёл теннисчилар ассоциацияси (WTA) профессионал теннисчиларнинг ҳафталик янги рейтингини эълон қилди. Унга кўра, ўзбекистонлик теннисчи Камилла Раҳимова топ-100 таликдан жой олди ва Ўзбекистоннинг биринчи ракеткачисига айланди.

Янгиланган рейтингда яқинда Ўзбекистон фуқаролигини олган Камилла Раҳимова 97-ўрин билан Ўзбекистоннинг биринчи ракеткасига айланди. Ундан кейинги ўринда яна бир маҳаллийлаштирилган теннисчи Полина Кудерметова 104-ўрин билан Ўзбекистон теннисчилари орасида 2-ўринни эгаллаб турибди. Мария Тимофеева 143-ўрин, Лайма Владсон эса 881-поғонада бормоқда. 

WTA рейтингда беларуслик Арина Соболенко катта фарқ билан пешқадамлик қилмоқда. Иккинчи поғонадан польшалик Ига Свёнтек жой олган бўлса, кучли учликка америкалик Коко Гауфф якун ясаган. 

Эслатиб ўтамиз, аввалроқ Ўзбекистон фуқаролигини олган Камилла Раҳимова  Франциянинг Анже шаҳрида бўлиб ўтган WTA 125 Open Angers Arena Loire турнирида чемпионликни қўлга киритган эди.