Камерунда дунёдаги энг кекса Президент яна сайланди

Камерунда 92 ёшли Поль Бийя саккизинчи марта президентлик лавозимига қайта сайланди. Бу ҳақда BBC хабар берди.

Қайд этилишича, Камерун Конституциявий кенгаши жорий йилнинг 12 октябрь куни бўлиб ўтган президентлик сайловининг натижаларини  эълон қилган. Бийя 53,7 фоиз овоз тўплаган. Унинг асосий рақиби – мухолифатдаги Камерун Миллий қутқарув фронти номзоди Исса Чирома эса 35,2 фоиз овоз йиғган.

Сайловларда Бийядан ташқари яна 9 номзод иштирок этган. Улар орасида Президентнинг собиқ иттифоқчилари ҳам бор, жумладан, Чирома ҳам шулар орасида. 

Чирома овоз бериш якунлангач, ўзини сайловдаги ғолиб деб эълон қилган. Камеруннинг бир нечта шаҳарларида мухолифат тарафдорлари норозилик намойишларига чиққан, уларнинг айримлари тартибсизликлар ва полиция билан тўқнашувларга айланиб кетган. Чирома штаби ва маҳаллий ҳокимият органлари расмий натижалар эълон қилинишига бир кун қолганда, мамлакатнинг иқтисодий маркази бўлган Дуала шаҳрида юз берган тартибсизликлар чоғида 4 киши ҳалок бўлганини маълум қилган.

Маълумот учун, Поль Бийя дунёдаги энг кекса давлат раҳбари ҳисобланади. У 1982 йилдан бери Камерун Президенти лавозимини эгаллаб келмоқда. 2008 йилда у президентлик муддатини чекловчи қонунни бекор қилиб, ҳокимиятда муддатсиз қолиш имкониятини яратган. Янги етти йиллик муддат унга деярли 100 ёшгача давлат раҳбари бўлиб қолиш имконини беради.

Бийянинг сайловдаги ғалабалари доимо овозларни сохталаштириш ҳақидаги айбловлар билан бирга кечади. Унинг партияси – Камерун халқ демократик ҳаракати ҳамда ҳукумат бу айбловларни қатъиян рад этиб келади.

Эслатиб ўтамиз, аввалроқ Камерун Президенти, 91 ёшли Поль Бийя 2025 йилнинг октябрь ойида бўлиб ўтадиган президентлик сайловларида ўз номзодини қўйишини айтди.