Кабо-Верде Уругвайни қолдириб, плей-оффга чиқди

Бугун, 27 июнь куни Кабо-Верде миллий терма жамоаси Жаҳон чемпионати “Ҳ” гуруҳи 3-турида Саудия Арабистони билан 0:0 ҳисобида дуранг ўйнади. Шу тариқа, Кабо-Верде илк мундиалидаёқ плей-офф босқичига йўлланма олди.

Жаҳон чемпионатида илк бор иштирок этаётган Кабо-Верде гуруҳ босқичини 3 очко билан якунлаб, иккинчи ўрин орқали плей-офф йўлланмасини қўлга киритди. Қизиғи, жамоа бу натижага бирорта ҳам ғалаба қозонмасдан эришди. Аввалги турларда улар Испания билан 0:0 ва Уругвай билан 2:2 ҳисобида дуранг ўйнаган эди.

Гуруҳнинг иккинчи учрашувида Испания Уругвайни 1:0 ҳисобида мағлуб этиб, 7 очко билан биринчи ўринни эгаллади. Уругвай эса 2 очко билан учинчи ўринда қолди ва энг яхши учинчи ўринни эгаллаган саккиз жамоа қаторига кира олмагани учун мусобақани тарк этди. 

Саудия Арабистони ҳам 2 очко тўплади, аммо тўплар нисбати бўйича Уругвайдан ортда қолиб, гуруҳда сўнгги ўринни банд этди.

Эндиликда Кабо-Верде плей-оффнинг биринчи босқичида амалдаги жаҳон чемпиони Аргентинага қарши баҳс олиб боради. Учрашув жорий йилнинг 4 июль куни АҚШнинг Флорида штати, Майами шаҳрида ўтказилади. 

Испания эса 1/16 финалда “Ж” гуруҳида иккинчи ўринни эгаллайдиган Австрия ёки Жазоир терма жамоаларидан бирига қарши майдонга тушади. Ушбу баҳс 2 июль куни АҚШнинг Калифорния штатидаги Инглвуд шаҳрида бўлиб ўтади.