Қозоғистон авиакомпаниялари Европа Иттифоқининг “қора рўйхати”га киритилмади

Қозоғистон авиакомпаниялари Европа “қора рўйхати”га киритилмайди. Бу ҳақда Саноат ва инфратузилмани ривожлантириш вазири Каирбек Ускенбаев маълум қилди, деб хабар бермоқда “Казинформ”.

2022 йил 1 июнь куни Европа Комиссиясининг Авиация хавфсизлиги қўмитаси Қозоғистон Республикаси авиация маъмуриятлари ва Қозоғистон авиакомпанияларининг Европага парвозларига нисбатан расмий қарорини эълон қилди. 

Саноат ва инфратузилмани ривожлантириш вазири Европанинг 27 давлати авиация маъмурияти раҳбарлари Қозоғистон авиакомпанияларининг Европага парвозларини чекламасликка ва Қозоғистонни қора рўйхатга киритмасликка қарор қилганини таъкидлади. 

“Улар Қозоғистонда парвозлар хавфсизлигини таъминлаш соҳасидаги мавжуд вазият ва ҳукуматимиз томонидан сўнгги уч йил давомида амалга оширилган чора-тадбирларни ижобий баҳоладилар. Биз буни катта ютуқ деб биламиз, чунки европаликларни ишонтириш учун биз қаттиқ ҳаракат қилишимиз керак эди”, дейди вазир. 

Шунингдек, у 2009 йилда Халқаро фуқаро авиацияси ташкилоти аудит давомида ICAO стандартларини амалга оширишнинг паст даражаси -47% даражасида аниқланганида Қозоғистон аллақачон қора рўйхатга киритилганини эслатди. Шу сабабли Еврокомиссия фақат парвоз географияси ва самолётлар паркини кенгайтириш имконияти чекланган Air Astana’дан ташқари, Қозоғистоннинг барча авиакомпанияларининг Европа мамлакатларига парвозларини тақиқлади, 

“Ислоҳотнинг самарадорлиги ўтган йилнинг август ойида, ICAO аудиторлари томонидан ўтказилган мустақил аудит натижасида Қозоғистон парвозлар хавфсизлиги даражасини 84 фоизга оширганида исботланган эди. Бу жаҳон ўртача кўрсаткичидан 15 фоизга юқори. Бу кўрсаткич бўйича биз Нидерландия, Бельгия, Португалия, Дания ва Исландия билан бир қатордамиз”, дейди Ускенбаев.

Шу билан бирга, ўтган йил охирида Bek Air самолётининг ҳалокатга учрагани сабабли Еврокомиссия Қозоғистондаги парвозлар хавфсизлиги билан боғлиқ вазиятдан яна хавотир билдирган. 

Бундан ташқари, Қозоғистон хорижий авиакомпанияларнинг транзит парвозлари учун жозибадор бўлиб қолади, маҳаллий авиаташувчилар эса парвозлар географиясини кенгайтира олади.

Маълумот учун, Европа Иттифоқи мамлакатларига парвозлар тақиқланган авиакомпаниялар қора рўйхатига Европа экспертларининг фикрига кўра, авиация хавфсизлиги билан боғлиқ муаммолар тўғри ҳал қилинмаган ва самолётларининг Европа Иттифоқига аъзо ҳар қандай давлатнинг ҳаво ҳудудига кириши тақиқланган авиакомпаниялар киритилади. 

Бугунги кунда ушбу рўйхатга 22 та мамлакат киритилган бўлиб, унда Россия, Беларусь, Арманистон, Афғонистон ва Қирғизистоннинг барча авиакомпаниялари “қора рўйхат”га киритилган.