Қорақалпоғистонга заргарлик буюмларини ноқонуний олиб кираётган шахс ушланди

Қозоғистондан Қорақалпоғистон ҳудудига кириб келган фуқаронинг қўл сумкасидан 17 дона олтиндан ясалган заргарлик буюмлари топилди. Бу ҳақда Қорақалпоғистон Божхона бошқармаси хабар берди. 

Маълум қилинишича, бошқарманинг Контрабандага қарши курашиш бўлими ходимлари томонидан “Қорақалпоғистон” темирйўл чегара божхона постига 652-сонли “Бейнеу–Нукус” йўналишидаги йўловчи поездининг 9-вагонида Қозоғистондан кириб келган фуқаронинг қўл сумкаси холислар иштирокида кўздан кечирилган.

Натижада йўловчи божхона ходимининг оғзаки сўровда айтмаган, божхона декларациясида ёзиб кўрсатмаган, яширин тарзда олиб ўтишга уринган 6 турдаги 17 дона жами оғирлиги 79,50 грамм бўлган олтиндан ясалган заргарлик буюмларини ҳеч қандай ҳужжатларсиз олиб келаётгани аниқланган. 

Маълумот учун, темирйўл орқали ҳаракатланганда фуқаролар эквиваленти 500 доллар қийматидаги товарларни Ўзбекистон ҳудудига божсиз олиб кириши мумкин. Қиймати ундан ортган товарларга нисбатан божхона тўловлари ундирилиши назарда тутилган.

Эслатиб ўтамиз, аввалроқ Тошкент халқаро аэропортида 1 млрд сўмлик тақинчоқларни яширинча олиб ўтишга уринганлар тўхтатилганди.