Қодиров карантинни бузганларни жазолашнинг антиқа усулини таклиф қилди

Чеченистон раҳбари Рамзан Қодиров ўзини изоляция қилиш режимини бузганларни жазолашнинг янги усулини жорий этди. Унга кўра, қоидабузарлар ишлагани қишлоқ хўжалиги соҳасига йўналтирилади.

Мамлакат раҳбарининг сўзларига кўра, қариндошларидан бирининг хатоси учун бутун оилани жазолаш адолатсизликдир. Шунинг учун ҳуқуқбузарлар жамият олдидаги қарзини бошқача тарзда тўлайди. "У уйда ўтирмади ва кўчага чиқиб кетди? Майли, кўчага чиққиси келган бўлса, кун бўйи майдонда ишласин ва фойда келтирсин. Биз унга иш топамиз. Далаларни ҳайдашсин, экин экиб ўстиришсин”, деди Қодиров.

Рамзан Қодировнинг сўзларига кўра, қоидабузарлар бутун Россия бўйлаб эпидемия тугагунча уйларига қайтмайди.

Қодиров карантин қоидаларини бузувчиларни бир неча бор танқид қилган. 6 апрель куни Чеченистон раҳбари хавфсизлик кучларини ўз-ўзини изоляция қилиш режимининг қоидабузарини калтаклагани учун мақтади ва уларни қўллаб-қувватлашга ваъда берди. "Мен минглаб одамларни кўмишдан кўра, битта одамни калтаклаш афзал. Шунинг учун қаттиқ чоралар қўллаяпман. Керак бўлса, калтаклайман. Мен уларни қамоқхонага, ертўлага ташлайман, лекин ўз халқимни ҳимоя қиламан”, деди Қодиров.

Аввалроқ, Чеченистон соғлиқни сақлаш вазири Эльхан Сулаймонов, республикада коронавирус инфекцияси чўққига чиқаётганини, май ойининг бошларига келиб, у пасайишидан умид қилаётганини маълум қилган эди.