Қирғизистонлик фаол Ташиев истеъфоси ортидан уйидан олиб кетилди

Қирғизистонлик жамоат арбоби Бекболот Талгарбеков ҳуқуқ-тартибот идоралари ходимлари томонидан қўлга олинди. Бу ҳақда унинг ўғли Арстан Талгарбековга таяниб, “24.kg” нашри хабар берди. 

Унинг сўзларига кўра, бугун, 11 февраль куни эрталаб Бишкекнинг 8-микрорайонидаги Талгарбековнинг квартирасига милиция ходимлари тинтув ўтказиш учун келган. Тинтув ўтказилгандан сўнг  у сўроқ қилиш учун ИИВ Жиноят қидирув бош бошқармасига олиб кетилган.

Арстан Талгарбековнинг аниқлик киритишича, отасига уч нафар ходим ҳамроҳлик қилган, ҳуқуқ-тартибот ходимларининг бир қисми процессуал ҳаракатларни давом эттириш учун квартирада қолган.

Ички ишлар вазирлиги матбуот хизмати қўлга олиш ва тинтув ҳақидаги маълумотни рад этмоқда.

Арстан Талгарбеков, шунингдек, отаси давлат раҳбари Садир Жапаров ва Миллий хавфсизлик давлат қўмитасининг собиқ раҳбари Қамчибек Ташиев сиёсатини тўлиқ қўллаб-қувватлаганини айтган. Унинг сўзларига кўра, мурожаат матнида ноқонуний чақириқлар мавжуд эмас.

Маълумот учун, Бекболот Талгарбеков мамлакат президентининг янги сайловини ўтказишни зудлик билан бошлаш ташаббуси билан жамоавий мурожаат ташаббускорларидан бири эди. Ҳужжатни 75 киши – олимлар, собиқ бош вазирлар, собиқ депутатлар ва жамоат арбоблари имзолаган. Айни вақтда ҳужжатни имзолаган 75 киши терговга жалб қилинаётгани ҳақида маълумотлар мавжуд. 

Аввалроқ президент матбуот котиби Садир Жапаров бўлинишга йўл қўймаслик ҳақида гапирганда Қамчибек Ташиевни эмас, балки Бекболот Талгарбеков, Эмилбек Узоқбоев ва бошқаларни назарда тутганини маълум қилганди.