Қирғизистон Ўзбекистонга чекловларсиз картошка етказиб беради

Қирғизистон ва Ўзбекистон қишлоқ хўжалиги маҳсулотлари савдосини кенгайтириш, қўшма қайта ишлаш корхоналарини ривожлантириш ҳамда экспорт учун мавжуд тўсиқларни бартараф этиш ниятида. Хусусан, томонлар қирғиз картошкасини Ўзбекистон бозорига етказиб беришда ҳеч қандай чекловлар бўлмаслигини тасдиқлади. Бу ҳақда “24.kg” хабар берди.

Қайд этилишича, ушбу масалалар кеча, 11 ноябрь куни Тошкентда Қирғизистон Вазирлар Маҳкамаси раиси ўринбосари – вазир Эрлист Акунбеков ва Ўзбекистон Республикаси Қишлоқ хўжалиги вазири Иброҳим Абдураҳмонов ўртасида муҳокама қилинган.

Учрашув давомида Қирғизистон томони маҳаллий қишлоқ хўжалиги маҳсулотларини қайта ишлаш корхоналарини Ўзбекистоннинг тегишли реестрига киритиш жараёнини тезлаштиришни таклиф қилган. Бу қирғизистонлик ишлаб чиқарувчиларга қўшни мамлакат бозорига чиқиш имкониятларини кенгайтириш имконини беради.

Учрашув иштирокчилари қайта ишлаш тармоғига инвестициялар жалб қилиш ва қўшма Қирғизистон–Ўзбекистон корхоналарини ташкил этиш масалаларига алоҳида эътибор қаратган. Шунингдек, ишлаб чиқариш кооперацияси, уруғчиликни ривожлантириш, чорвачиликка замонавий технологияларни жорий этиш ва наслчилик ишларини такомиллаштириш масалалари ҳам муҳокама қилинган.

Томонлар Ўзбекистон Республикасига қирғиз картошкасини узлуксиз етказиб беришни таъминлаш ва уни етиштириш соҳасида тажриба алмашишни давом эттиришга келишиб олган.

Шунингдек, Қирғизистон Ўзбекистонга қирғизистонлик деҳқонлар етиштирган картошкани етказиб беришда қўшилган қиймат солиғини (ҚҚС) бекор қилишни таклиф этган. Учрашув чоғида томонлар Президентлар Шавкат Мирзиёев ва Садир Жапаровнинг қишлоқ хўжалиги соҳасидаги ҳамкорликни кенгайтириш бўйича келишувлари ижросини муҳокама қилган.

Қирғизистон картошкаси экспортига алоҳида урғу берилди. Акунбеков уни Ўзбекистонга етказиб беришда ҚҚСни бекор қилиш таклифи билан чиққан.

Иброҳим Абдураҳмонов Қирғизистондан картошка ва бошқа турдаги қишлоқ хўжалиги маҳсулотлари импорти учун “яшил йўлак” яратиш ташаббусини илгари суришга кўмаклашишга тайёр эканлигини билдирган.

Бундан ташқари, томонлар Қирғизистонда қишлоқ хўжалиги маҳсулотларини қайта ишлаш ва сақлаш бўйича қўшма корхона ташкил этишга келишиб олган. Лойиҳани Ўзбекистон–Қирғизистон тараққиёт жамғармаси маблағлари ҳисобидан молиялаштириш кўзда тутилмоқда.

Эришилган яна бир келишув уруғчилик соҳасига тааллуқли. Қирғизистон ҳудудида уруғлик етиштиришни ташкил этиш ва кейинчалик уни Ўзбекистон бозорида сотиш режалаштирилмоқда.

Шу билан бирга, қўшма корхонани ташкил этиш муддатлари, инвестициялар ҳажми ва ҚҚСни эҳтимолий бекор қилишнинг аниқ шартларига ойдинлик киритилмаган.

Учрашув якунлари бўйича иштирокчилар аграр соҳада савдо-иқтисодий ва инвестициявий ҳамкорликни кенгайтиришга, шунингдек, қўшма лойиҳаларни амалга ошириш бўйича амалий ишларни давом эттиришга тайёр эканликларини тасдиқлаган.