Италияда сунъий интеллект томонидан ёзилган илк газета нашр этилди

“Il Foglio” газетаси тўлиқ сунъий интеллект томонидан ёзилган илк сонини чоп этди. Сунъий интеллект барча мақолалар, сарлавҳалар ва ҳатто ҳажвий изоҳларни ҳам ўзи ёзган. Бу ҳақда “The Guardian” хабар берди.

“Il Foglio” бош муҳаррири Клаудио Чераса бу тажриба орқали сунъий интеллект технологиялари замонавий журналистикага қандай таъсир ўтказаётганини кўрсатишни мақсад қилганини таъкидлади. Махсус нашр “Il Foglio” AI кеча, 18 март куни чоп этилган бўлиб, тўрт саҳифадан иборат ва босма ҳамда онлайн форматда мавжуд.

“Бу тўлиқ сунъий интеллект томонидан ёзилган дунёдаги биринчи ҳар кунлик газета бўлиб, ундаги мақолалар, сарлавҳалар, иқтибослар ва шарҳларнинг барчасини AI ёзган”, деди Чераса.

Унинг сўзларига кўра, журналистлар бу лойиҳада фақатгина сунъий интеллектга саволлар бериш ва тайёр матнларни таҳрир қилиш билан шуғулланган. AI томонидан ёзилган мақолалар оддий ва тушунарли бўлиб, грамматик хатолар деярли учрамаган. Аммо бирорта ҳам мақолада ҳақиқий одамларнинг тўғридан тўғри иқтибослари келтирилмаган. Шунингдек, шахсий фикрлар, чуқур таҳлил ва жонли интервьюлар анъанавий журналистикадан фарқли равишда йўқ бўлган.

Черасанинг фикрича, ушбу тажриба AI янгилик яратиш жараёнига қандай мослаша олишини тушунишга ёрдам беради.

Бошқа йирик нашрлар ҳам сунъий интеллектни ишлатишини очиқ тан олмоқда. Масалан, “Associated Press” ахборот агентлиги журналистлар учун AI имкониятларидан фойдаланиш бўйича қўлланма ишлаб чиққан. Унга кўра, сунъий интеллект сарлавҳалар яратиш, мақола ғояларини ишлаб чиқиш, интервью саволларини тузиш ва грамматик таҳрирлаш каби жараёнларда ёрдам бериши мумкин. Бироқ бутунлай AI томонидан ёзилган материалларни чоп этиш тақиқланган ва журналистлар матндаги ҳар бир сўз учун жавобгар бўлиши шарт.

Маълумот учун, 2024 йил август ойида OpenAI технологик компанияси нуфузли “Conde Nast” нашриёт уйи билан кўп йиллик ҳамкорлик келишувига эришди. “Vogue”, “The New Yorker”, GQ каби журналларни чиқарувчи Conde Nast раҳбарияти ушбу ҳамкорлик орқали медиамарказларнинг ўзгараётган бизнес-моделларидан келиб чиқадиган йўқотишларни қоплаш имкониятини кўрмоқда.

Эслатиб ўтамиз, аввалроқ сунъий интеллект асосида ишловчи одамсимон роботнинг биринчи асари – инглиз математиги Алан Тьюринг баландлиги 2,2 метр бўлган “God AI” номли портрети Нью-Йоркда кимошди савдосида 1,08 миллион долларга сотилган эди.