Италия дунёдаги энг катта учоқни ясамоқчи

Италияда тўрт қаватли уй баландлигидаги дунёдаги энг йирик самолёт барпо этилади. Бу ҳақда “Il Corriere Della Sera” хабар берди.

Қайд этилишича, ҳаво кемаси “WindRunner” деб аталади. У тўрт қаватли уй баландлигидаги йирик юк самолёти бўлиб, фақат жуда катта ҳажмдаги юкларни, хусусан, ҳозиргилардан анча каттароқ бўлган янги авлод электр станциялари учун мўлжалланган шамол турбиналарини ташишга мўлжалланади. Ушбу улкан самолёт лойиҳасини 2016 йилда Массачусетс технология институти профессори ва қайта тикланувчи энергетика бўйича мутахассис Марк Лундстром тадқиқотлари асосида ташкил этилган Американинг Radia стартапи амалга оширмоқда.

Маълумотларга кўра, “WindRunner” – олд томондан юк ортиш тизимига эга, узунлиги 108 метр, қанот кенглиги 80 метр, парвози масофаси 2 минг километргача етадиган самолёт. Лойиҳа бўйича аллақачон Leonardo, Magnaghi Aerospace, Aernnova, шунингдек, Голландия ва Буюк Британия компаниялари билан ҳамкорлик шартномалари имзоланган. Самолётнинг асосий йиғув маркази Италияда – Пуглиядаги Grottaglie заводида бўлиши режалаштирилган.

Бу лойиҳа орқали бир неча миллиард евро инвестиция жалб қилиниши, камида 2,5 мингта янги иш ўрни яратилиши, билвосита иш ўринлари эса бундан беш баравар кўп бўлиши кутилмоқда. Уни амалга ошириш йил охиригача бошланиши кутилмоқда.

Эслатиб ўтамиз, аввалроқ  Италия ҳукумати дунёдаги энг узун осма кўприк қурилиши лойиҳасини маъқуллаганди. Мессина бўғозидан ўтувчи кўприкнинг умумий узунлиги қарийб 3,7 километр бўлади, осма қисми эса 3,3 километрни ташкил этади. Бу ҳозирги кунда энг узун бўлган Туркиядаги Чаноққалъа кўпригидан 1 277 метрга узун. Кўприкда ҳар икки йўналишда учта автомобиль йўлаги ва икки қатор темирйўл бўлади. Бу Италияга Қуролли кучларни Сицилияга тезроқ элтишга имкон беради.