Бир қотиллик изидан очилган иккинчи ваҳшийлик

Туркияда яна бир ўзбекистонлик аёл ваҳшийларча ўлдирилгани аниқланди. Боши узиб ташланган, тана аъзолари эса бўлаклаб чиқинди идишларига улоқтирилган Дурдона Ҳакимова билан боғлиқ жиноят ишининг даҳшати ҳали тарқаб улгурмасидан, энди унинг дугонаси ҳам у ўлдирилган уйда майдалаб ташлангани ҳақидаги маълумотлар пайдо бўлди.

Қотиллар ҳам ўшалар – икки ўзбек эркаги. Истанбулнинг Шишли туманида январь ойи охирида бошланган “чамадон қотиллиги” терговида кутилмаган ва фожиали бурилиш пайдо бўлди. Аввалига фақат бир аёлнинг аянчли тақдири бўлиб кўринган бу жиноят ортида ўзбекистонлик муҳожирлар томонидан содир этилган серияли ваҳшийлик яширингани фош бўлди.

Иккинчи қурбон: Сайёранинг сирли ғойиб бўлиши

Жорий йил, 6 февраль куни 32 ёшли Сайёра Эргашалиеванинг оиласи ижтимоий тармоқлар орқали мурожаат қилиб, қизларидан дарак йўқлигини маълум қилди. Сайёра 2025 йилнинг 28 декабрида Туркияга келган ва охирги марта қотилликдан бир кун олдин 23 январь куни алоқага чиққанини айтишди. Қизи билан боғланолмаган ота-она уни топиш умидида Туркияга учиб келган.

Полиция кузатув камералари орқали Сайёранинг сўнгги бор кўринган манзилини текширганда, мудҳиш ҳақиқат юзага чиқди. У айнан 24 январь куни бўлакланган ҳолда топилган Дурдона Ҳакимованинг қотиллиги содир бўлган уйга борган. Камера ёзувлари шуни кўрсатадики, Сайёра 23 январь куни уйга кирган ва у ердан бошқа чиқмаган. Унинг ортидан эса Дурдонанинг ўлимида гумонланаётган икки шахс – 31 ёшли Дилшод Турдимуродов ва 29 ёшли Ғофуржон Камолхўжаев ҳам шу манзилга кирганини аниқлаган.

Сайёра Дурдонадан бор-йўғи бир кун олдин, айнан бир хил услубда ўлдирилиб, жасади ҳам бўлакланган ҳолда турли ҳудудларга ташлаб юборилган. Текширув давомида Сайёра Эргашалиева ва Дурдона Ҳакимова ҳамда икки гумонланувчи мақомида бўлиб турган мавжудотлар қарийб бир ой давомида бир уйда яшагани, марҳума Сайёра ва Ғофур эса ўзаро муносабатда бўлгани аниқланган.

Полиция хавфсизлик камераларини кўздан кечириб, 24 январь куни гумонланувчилар уйдан бир неча бор чиқинди қоплари билан чиқиб кетганини, сўнг оқ рангли чамадон билан манзилни тарк этганини аниқлашган. Қаранг, яна чамадон. Дурдонанинг жасадини ҳам худди шундай, катта кўчада олиб юришган пайти уларда ҳаяжон ёки қўрқув сезилмагани жамоатчилик томонидан алоҳида муҳокама қилинган эди. Энди янги очилган тафсилотлар сабаб уларда тажриба борлигини тахмин қилиш мумкин.

Кузатувга қайтамиз. Қотилликда гумон қилинаётган кимсалар бемалол кўчадан такси тўхтатиб, мурда ёки унинг бир қисми жойлаштирилган чамадон билан Фотиҳ туманига боргани, жасад бўлакларини ахлат контейнерига ташлагач, пиёда “Yenikapı Marmaray” бекатига йўл олгани аниқланган.
Тергов жараёнида Дурдона Ҳакимова қотиллиги бўйича ҳибсда бўлган икки ўзбекистонлик билан ўтказилган сўроқларда Сайёра Эргашалиева ҳам 23 январь куни айни уйда совуқ қурол билан ўлдирилгани маълум бўлган. Прокурор кўрсатмасига асосан жазони ижро этиш муассасасидан олиб чиқилиб, яна қўлга олинган икки гумонланувчиларга нисбатан “қасддан одам ўлдириш” моддаси бўйича жиноят иши қўзғатилган. Ички ишлар идорасидаги тергов ҳаракатларидан сўнг уларни бугун, 13 февраль куни судга олиб борилиши кутилмоқда.

Биринчи фожиа: Ахлат контейнеридаги “қонли топилма”

Ушбу занжирли жиноятлар жорий йил, 24 январь куни Шишлининг Дуатепе маҳалласида фош бўлган эди. Чиқинди йиғувчи Окан исмли шахс контейнердан чойшабга ўралган, боши ва оёқлари кесилган аёл танасини топган. Олиб борилган тезкор қидирув ишлари натижасида қурбоннинг шахси бармоқ излари орқали аниқланган – у 37 ёшли Дурдона Ҳакимова эди.

Жиноятчилар ўз қурбонини шунчалик совуққонлик билан бўлаклашганки, ҳар бир тана аъзосини алоҳида елим халтага жойлаб, қадоқлашган! Жиноятни содир этганликда гумонланаётган икки шахс – 31 ёшли Дилшод Турдимуродов ва 29 ёшли Ғофуржон Камолхўжаев ўша куннинг ўзидаёқ Грузияга қочмоқчи бўлганида, Истанбул аэропортида қўлга олинди. Туркиянинг маҳаллий ОАВлари улар қочишга ҳам пухта тайёргарлик кўргани, ҳатто қотиллик ва қочиш орасида сартарошхонага кириб соч-соқолини олишга ҳам вақт топишгани ҳақида хабар берди.

Даҳшатли қотиллик Туркияда жамоатчилик орасида турли муҳокамаларга сабаб бўлди. Ҳатто, хотин-қизлар томонидан норозилик намойишлари ҳам ўтказилди. Турли аёллар ҳуқуқига оид ва маҳаллий ҳокимиятни айблашга қаратилган баннерни кўтарган норозилик фаоллари кўчага чиқди.

30 январь куни Дурдона Ҳакимованинг жасади ва унинг икки нафар фарзанди Ўзбекистоннинг Истанбул шаҳридаги Бош консулхонаси кўмагида Ватанга қайтарилгани, барча харажатлар Бош консулхона ҳамда Миграция агентлиги ҳисобидан қоплаб берилгани маълум қилинди.

Совуққон қотиллар

Тергов давомида қотилларининг ҳаракатлари таҳлил қилинса, бу тасодифий жиноят эмас, балки тизимли ваҳшийлик экани кўринади. Дастлабки маълумотларга кўра, жорий йил 22 январь куни марҳумалар ҳамда гумонланувчилар Истанбул шаҳрининг Фотиҳ туманида жойлашган ресторанлардан бирида биргаликда тушлик қилган. Учрашув давомида Сайёра ва Ғофур ўртасида келишмовчилик юзага келган. Тахминларга кўра, можаро аёл Ўзбекистонга қайтмоқчи бўлгани учун келиб чиққан.

Бу тортишувдан 1 кун ўтиб, 23 январь куни икки дўст ўзаро тил бириктириб, Сайёра Эргашалиевани аввал пичоқ билан ўлдириб, танани бир неча қисмларга бўлиб, Фотиҳ туманидаги ахлат қутиларига ташлаган. 24 январь куни қотиллар биринчи қурбонларининг телефонидан Дурдона Ҳакимовага СМС хабар юбориб, уни алдаб чақириб, дугонаси сингари пичоқ тиқиб ўлдириб, танани бир нечта қисмларга бўлиб, Шишли туманидаги ахлат қутиларига ташлаган.

Бугун, Сайёра Эргашалиеванинг ҳам жасади топилганлиги ҳақида турк ОАВда кескин муҳокамалар авж олган. Бироқ, Истанбул Суд тиббий экспертизасига ҳозирча жасад олиб келинмагани маълум қилинди. Ўзбекистон Республикасининг Истанбул шаҳридаги Бош консулхонаси мазкур ҳолатни доимий назоратга олгани ва Туркия ҳуқуқни муҳофаза қилувчи органлари билан яқин ҳамкорликда иш олиб бораётгани ҳақида расмий маълумот берди.

Таҳлилий хулоса: Мусофирликдаги хавфли “танишувлар”

Ушбу воқеа ўзбекистонлик муҳожирлар орасидаги ижтимоий хавфсизлик масаласини зарурий тарзда кун тартибига қўяди. Қотилларнинг ҳам, қурбонларнинг ҳам битта миллат вакиллари экани, жиноятнинг бундай ўта ваҳший усулда содир этилгани жамият учун жиддий сигналдир.

“Қандай қилиб инсон ўз ватандошига нисбатан бундай ваҳшийликни амалга ошириши мумкин? Бу шунчаки “жанжал” оқибати эмас, балки ички олами емирилган, маразликка муккасидан кетган, қонундан қўрқмайдиган шахсларнинг режалаштирилган ҳаракатига ўхшайди” мазмунида фикр билдираётганлар кўп.

Истанбулнинг Шишли туманидаги ўша хонадоннинг икки аёл учун “қабрга айланиши”, хорижда яшаётган ватандошларимизни янада ҳушёрроқ бўлишга ва танишувларда эҳтиёткорликни йўқотмасликка чорлаши шарт. Сиз бугун турли сабаблар билан ишонаётган одамингиз эртага сизни қассоб қўйни бурдалаганидек, чавақалаб ташламаслигига аниқ ишонч ҳосил қилишингиз керак.

Сизнингча, хорижда юрган ватандошларимиз хавфсизлигини таъминлаш учун нималарга эътибор бериш керак? Бу каби жиноятларнинг олдини олиш мумкинми?