Иссиқлик ва иссиқ сув учун эски тарифларни сақлаш муддати қисқартирилди

Ўзбекистонда иссиқлик таъминоти ва иссиқ сувга олдиндан тўланган хизматлар учун эски тарифларни сақлаш муддати 12 ойдан 2 ойгача қисқартирилди. Бу ҳақда Вазирлар Маҳкамасининг “Коммунал хизматлар кўрсатиш қоидаларини тасдиқлаш тўғрисида”ги қарорида сўз боради.

Қайд этилишича, ҳужжатнинг 95-бандига олдиндан тўлов амалга оширилганда тарифни қўллаш тартиби бўйича ўзгартиришлар киритилган. Унга кўра, олдиндан тўланган хизматлар учун тарифни белгилаш муддати 12 ойдан 2 ойгача қисқартирилди.

Бу қуйидагиларни англатади:

• олдиндан тўлов амалга оширилганда, тариф тўлов санасидан амал қилади;
• белгиланган тариф олдиндан тўлов даври учун амал қилади, лекин 2 ойдан ошмаслиги керак;
• агар тариф ушбу даврда ўзгарса, тўланган хизматлар ҳажми учун қайта ҳисоблаш амалга оширилмайди;
• икки ойлик муддат тугагандан сўнг тўловлар амалдаги тариф бўйича амалга оширилади.
• Ўзгаришлар иситиш ва иссиқ сув хизматларига тегишли.

Маълумот учун, Ўзбекистонда табиий газ ва электр энергияси тарифлари ошганда ҳам янги тариф кучга киргандан бошлаб 2 ойгача эски тарифлар асосида ҳисоб-китоб қилинади. Бунинг учун абонентлар янги тариф кучга киришидан олдин тўлов қилиши керак ва санаси муҳим эмас.