Исроилдаги сайловларда араб партиялари рекорд натижага эришди

Исроилда бўлиб ўтган парламент сайловларида араб партиялари илк бор рекорд натижани қўлга киритди. Улар энди 120 та ўриндан 19 та мандатга эга. 2022 йилда бу кўрсаткич бор-йўғи 10 тани ташкил этган. Бу ҳақда “The Times of Israil” хабар берди.

Нашрнинг ёзишича, Исроил Бош вазири Биньямин Нетаньяхунинг ҳукмрон блоги овозлар 100 фоиз кўриб чиқилгач, парламентда 53 та ўринга эга бўлган. У кўпчиликни ташкил этиш учун зарур бўлган мандатлар сонини йиға олмаган. Мухолифат партиялари эса 48 та ўринни эгаллаган.

Ҳеч ким талаб қилинадиган кўпчиликни – 61 та ўринни тўплай олмаяпти. Экспертларнинг фикрича, бу янги ҳукуматни шакллантиришни қийинлаштиради. Бундан олдинги сайловларда Нетаньяху тарафдорлари Кнессетда 64 та ўринга эга эди.

Шу билан бирга, ҳукуматпараст “Ликуд” партияси сайловлар “ўғирланганини” маълум қилган. Ультраўнг сиёсатчи Итамар Бен-Гвир гўёки Қатардан молиялаштирилганликда гумонлар борлигини рўкач қилиб, араб партиялари етакчиларини ҳибсга олишга чақирган. Бундай молиялаштириш бўйича ҳеч қандай очиқ далиллар тақдим этилгани йўқ.

Агар мухолифат партиялари араб сиёсий кучлари билан ҳамкорлик қилишга келишиб олса, улар Кнессетда 67 та ўринни бирлаштириши ва кўпчиликни шакллантиришлари мумкин бўлади.

Эслатиб ўтамиз, аввалроқ Исроилда парламент сайловларида Биньямин Нетаньяху бошчилигидаги ҳукмрон коалиция ва унинг рақиблари ҳукумат тузиш учун зарур бўлган кўпчилик ўринни қўлга кирита олмаслиги мумкинлиги ҳақида хабар берилган эди.